Doston Tursunov: “Mashg'ulotda hamma astoydil ishlamoqda”

Mashg'ulotlar bilan birga sinov-nazorat o'yinlarida ham ishtirok etayotgan yoshlarimiz kuni-kecha “Navbahor” bilan kuch sinashib, 2:1 hisobida mag'lub bo'ldi. Uchrashuvdan so'ng himoyachi Doston Tursunov yig'in haqida fikrlarini bildirib o'tdi.

- 19 fevral kuni yana Toshkentda navbatdagi yig'inni o'tkazishga kirishdik. CHig'atoyda yig'ildik. Kuniga ikki mahaldan mashg'ulot o'tkazilmoqda. Ertalab jismoniy tayyorgarlik bo'yicha ishlasak, tushlikdan so'ng to'p bilan taktik jihatlar ustida shug'ullanyapmiz. Mashg'ulotlarni Ravshan aka Haydarov va Ilhom aka Mo'minjonov olib bormoqda.

- Tabiiyki har bir futbolchi o'zidan yaxshi taassurot qoldirish maqsadida astoydil ishlamoqda. CHunki har bir o'yinchi mundialda ishtirok etishni istaydi. Bu yo'lda o'zimizni ijobiy tomondan ko'rsatishimiz shart bo'ladi.

- Bu safargi yig'inimizga bir qator yangi nomzodlar taklif etilganini ko'rish mumkin. Yoshimiz teng bo'lgani uchun ham ularning kirishib ketishi u qadar murakkab bo'lmaydi deb o'ylayman.

- Maqsadim yoshlar terma jamoamiz bilan JCHga borish va u erda ham o'zimni ko'rsatish. Qolaversa “Neftchi”da debyutimni o'tkazishni xohlayman. Nasib qilsa bu yil asosiy tarkibda o'ynash uchun bor kuchim bilan xarakat qilaman – deydi Doston Tursunov.

Islombek Rustambekov