Doston Hamdamov: “Navbahor”ni har tomonlama o'rgangan edik”

O'yinda "qaldirg'ochlar"ning ikkinchi goliga mualliflik qilgan Doston Hamdamov bahs borasidagi o'z fikrlarini bildirdi.

-   Doston, avvalo, so'nggi o'yindagi uzoq kutilgan g'alaba bilan tabriklaymiz. “Navbahor”ga qarshi kechgan mazkur o'yin haqida nima deya olasiz?
-   Rahmat. Uchrashuvda ustunlikni qo'lga kiritganimizdan xursandman. Albatta, o'yindan oldin raqibni har tomonlama o'rgandik, tegishli ko'rsatmalar oldik. Kutilganidek,  “Navbahor” klubi kuchli va jamoaviy o'yin ko'rsatdi. SHunga qaramasdan, muhim g'alabaga erisha oldik.

-    “Bunyodkor” “Lahviya” va “Lokomotiv”ga qarshi o'yinlarda mag'lub bo'ldi. SHundan so'ng ruhiy tiklanish qiyin kechmadimi?
-   Yo'q, umuman olganda, ruhan tushkunlikka tushib qoldik, deb aytolmayman. Mag'lubiyatlardan kerakli xulosalar chiqardik, xolos. Hayot davom etadi, mahoratimizni oshirish uchun o'z ustimizda tinmay ishlayapmiz. Endilikda butun etiborimizni milliy chempionatga qaratamiz  va yanada samarali o'yinlar ko'rsatishga bor kuchimiz bilan harakat qilamiz.

Gulshan Sadullaeva suhbatlashdi