Dilshod Jabborovning sariq kartochkasi nechta?

Uchrashuvdan oldin namanganliklar safida kichik tushunmovchilik yuzaga kelgan. Yani, "Navbahor" oliy liga 5-turida "Bunyodkor" mehmoni bo'lgan edi. Ana shu uchrashuvning 21-daqiqasida Dilshod Jabborovga sariq kartochka ko'rsatilgani protokolda qayd etilgan edi. Vaholanki, o'sha bahsni bevosita stadiondan turib matnli translyaciya qilgan saytimiz xodimi ham, "Bunyodkor" va "Navbahor" klublarining rasmiy tvitter akkauntlari ham o'sha vaziyatda bosh hakam Dmitriy Pislegin sariq kartochkani Jabborovga emas, Robbim Hasanovga ko'rsatganini yozishgan edi. "Navbahor" matbuot kotibining malum qilishicha, o'yindan keyin uchrashuvning tasviri qayta ko'rib chiqilganda ham sariq aynan Robbim Hasanovga ko'rsatilgani malum bo'lgan. Lekin, o'yinning rasmiy protokolida Jabborovga sariq ko'rsatilgan deb yozilgan.

Oliy liganing so'nggi turida Dilshod Jabborov sariq kartochka oldi, agar "Bunyodkor" bilan o'yindagi "sariq" bilan qo'shib hisoblasak "Navbahor" sardorining sariqlari 4taga etdi va u bugungi "Lokomotiv"ga qarshi bahsni o'tkazib yuborishi kerak. Aslida esa uning sariq kartochkalari uchta.

Olgan malumotlarimizga qaraganda "Navbahor" vakillari ana shu ishga aniqlik kiritish maqsadida O'FF ga murojaat qilishgan. Agar bugun Jabborov maydonga tushmasa, uning nomiga "Bunyodkor"ga qarshi uchrashuvda "yozilgan" sariq kartochka o'z kuchida qolgan bo'ladi va futbolchi oliy liga 11-turida kartochkalardan "tozalangan" holda o'ynashi mumkin.

Eslatib o'tamiz, "Lokomotiv" - "Navbahor" uchrashuvi 18:00 da boshlanadi.