Dilshod Andaev: "Yoshlarimiz JCH yo'llanmasini qo'lga kiritishini xohlayapmiz"

Bo'lajak bahs oldidan taniqli yoshlar murabbiyi Dilshod Andaev bilan qisqacha suhbatlashdik. Kezi kelganda aytish joizki, Osiyo chempionatida O'zbekiston sharafini himoya qilayotgan Otabek SHukurov, Asliddin Abdiev va Eldor SHomurodovning birinchi murabbiyi aynan Andaev hisoblanadi.
 
- Yoshlar terma jamoamizning har bir uchrashuvini imkon qadar TV orqali kuzatib boryapman. Musobaqagacha yigitlarni o'yin amaliyoti kam bo'ldimi yoki qandaydir hayajon bosdimi bilmadimu, guruhning dastlabki uchrashuvlarida futbolchilar o'zlarini to'liq ko'rsata olmadi. Hujumni yakunlashga kelganda oqsayapsmiz. Bu kasallik chempionatimizda ham bor.  Avstraliya bilan o'yinda yigitlar yomon taassurot qoldirmadi. O'ylaymanki o'yindan-o'yinga ular o'zlarini ko'rsata oladi.

- Albatta ushbu musobaqada uch nafar shogirdim ishtirok etayotganidan mamnunman. Eldor Otabek SHomurodov, Asliddin Abdiev istedodli futbolchilar sanaladi. Lekin hali o'z ustida ko'p ishlashi talab etiladi. Sport shundayki, o'z ustida ishlamay qo'ysa o'z-o'zidan yo'qolib qoladi. Ishomanki futbolchilarimiz uchun hali hammasi oldinda. Yigitlar bilan kun ora internet orqali gaplashib turaman.

- Boshqa hamyurtlarim qatori men ham O'zbekiston yoshlar terma jamoasiga omad tilayman. Ishonamanki bugun ular Tailandni mag'lub eta oladi.  Ilohm jahon chempionati yo'llanmasini qo'lga kiritib, yurtimizga yorug' yuz bilan qaytib kelishlarini tilab qolaman. Barchamiz shuni xohlayapmiz - deydi "Mashal-2" bosh murabbiyi Dilshod Andaev.


Islombek Rustambekov suhbatlashdi.