Davronbek Karimqulov: "Kuchli raqib bilan durang g'alaba degani"

“Bunyodkor” bilan uchrashuvga tayyorgarlik jarayonida biz raqibning bir qator o'yinlarini kuzatdik, jamoa o'yinidagi zaif jihatlarni imkon darajasida o'rgandik. Murabbiylarimiz barcha chiziq vakillari bilan alohida suhbatlashib, kerakli ko'rsatmalarni berishgandi. O'yin davomida jamoadoshlarim o'z oldilaridagi vazifalarni to'liq uddalashdi, deb o'ylayman. Omadimiz chopganida bugun to'liq uch ochkolik ham bo'lardik. Afsuski, “Bunyodkor”ning javob golini kiritgan qarshi hujumi chog'ida ikki o'yinchimizning jarohatlanib, qolib ketishi ham bizga qimmatga tushdi. O'yin kurashlarga, ehtiroslarga boy bo'ldi. Uchrashuv davomida bazan qiziqqonlikka berilib ketgan bo'lsak, buni o'yinning katta ahamiyat kasb etganligiga yo'yarsizlar, deb umid qilaman. “Bunyodkor”dek kuchli raqibga qarshi o'yinda qo'lga kiritilgan ochko biz uchun g'alabaga teng. O'yindan keyin klub rahbariyati jamoamiz kiyinish xonasiga kirib, barchaga minnatdorchilik bildirdi. Keyingi o'yinlarda omad tiladi. Oldinda bizni hali yana qiyin o'yinlar kutib turibdi. Nasib bo'lsa, qolgan uchrashuvlarda ham bor kuch va mahoratimizni ishga solib, ishqibozlarimizni xursand etishga harakat qilamiz, deydi Davronbek Karimqulov.

"Metallurg" matbuot xizmati