Davron Karimqulov: “Obod”ga qarshi o'yin oson bo'lmaydi"

Mazkur jamoalar chempionatga tayyorgarlik jarayonida ikki marta nazorat uchrashuvida kuch sinashishgan hamda ularning ikkalasida ham poytaxtliklar zafar quchishgandi. Bo'lajak uchrashuv arafasida biz “Metallurg” futbol klubining tajribali himoyachilaridan biri Davron Karimqulovga yuzlandik va uning o'yin haqidagi fikrlarini bilishga qiziqdik:

- Qatorasiga uchta uchrashuvda g'alaba qozonib, mavsumni juda muvaffaqiyatli boshlagandik. Olmaliqda kechgan 4-tur uchrashuvini ham yomon boshlamadik. Tanaffusgacha o'z darvozamiz dahlsizligini saqlab qolishdan tashqari, bir qator gollik vaziyatlarni ham yaratdik. Afsuski, shu kuni omad biz tomonda bo'lmadi. Aks holda to'purar hujumchimiz Zohid Abdullaev, tezkor yarim himoyachilar Murod Toshmatov, Said Abdujabborov, Javohir Esonqulov, kuchli zarbalari bilan Umid Xonimqulovni doimiy ravishda hushyorlikda ushlab turgan Dilmurod Karimovlar imkoniyatlaridan unumli foydalanganida ehtimol yuz foizlik natijani qayd etib turgan bo'larmidik. SHuningdek, mazkur uchrashuvda o'zining optimal formasini tiklab borayotgan Jahongir Abdumo'minov hamda Doniyor Odilovlarning maydonga tushmaganligi ham o'z so'zini aytdi. Nazarimda, ikkinchi taymda mezbonlarning bir kishi kam bo'lib qolishi ham bizga salbiy tasir ko'rsatdi.

O'yindan keyin murabbiylar shtabi, barcha futbolchilar ishtirokida tezkor yig'in o'tkazildi va mazkur mag'lubiyat sabablari muhokama etildi. Yo'l qo'yilgan kamchiliklar, nuqsonlar jiddiy tanqid ostiga olindi. Keyingi o'yinlarda bunday xatolarni takrorlamaslik chora-tadbirlari ishlab chiqildi. Navbatdagi tur uchrashuvini o'z uyimizda, oliy liga debyutanti – “Obod” jamoasiga qarshi o'tkazamiz. Kuchlilar safida yangi jamoa bo'lishiga qaramasdan “Obod” shijoatli o'yinlari bilan hammani lol qoldirayapti. O'z maydonidagi ikkita uchrashuvda oliy liganing kuchli klublaridan – “Buxoro” va “Qizilqum”dan ochko tortib oldi. Navoiyliklar bilan o'yinda hatto g'alabaga yaqin ham turishgandi. Safar o'yinlarida ham poytaxtliklar muxlislarda iliq taassurot qoldirishdi. SHunday ekan, “Obod”ga qarshi o'yin biz uchun ham oson bo'lmaydi. Engil o'yinni kutmayapmiz va shunga yarasha tayyorgarlik ko'ryapmiz. Olmaliqdagi mag'lubiyatni unutib, yangi kuch bilan, g'ayrat shijoat bilan maydonga tushmoqchimiz. Barcha o'yinchilarimiz mazkur uchrashuvda ham chiroyli, sermahsul o'yinimiz bilan muxlislarimizni xursand etishga chog'lanishgan, deydi Davron Karimqulov.

Eslatib o'tamiz, Bekobodda o'tadigan “Metallurg” – “Obod” uchrashuvini poytaxtlik Olim Tolibjonov boshqarib boradi. Unga qanotlarda namanganlik Rasuljon Fozilov hamda Mo'minjon Majidovlar yordam berishadi. Zahiradagi hakam Dilshod Karimov. Hakamlar faoliyatini mazkur uchrashuvda Oleg Rubakov kuzatib borsa, PFLdan vakil sifatida musobaqalarni o'tkazish bo'limi xodimi Roman CHernikov ishtirok etadi.

SHu o'rinda eslatib o'tamiz, Olim Tolibjonov o'tgan mavsum “Metallurg” ishtirokidagi 3 ta o'yinni boshqargandi. Bekobodliklar mazkur o'yinlarning barchasini safarda o'tkazishgan va ulardan ikkitasida durang o'ynashgan (5-tur, “So'g'diyona” – 0:0, 29-tur, “Qizilqum” – 1:1), bitta o'yinda esa imkoniyatni boy berishgandi (23-tur, “Paxtakor” – 3:2).

 
16 aprel (shanba)
Metallurg (Bekobod) – Obod (Toshkent)
Hakamlar: O. Tolibjonov (Toshkent), R. Fozilov (Namangan), M. Majidov (Namangan), D. Karimov (Toshkent)
Nazoratchi: O. Rubakov (Toshkent).
O'zPFL vakili: R. CHernikov.