Davron Fayziev: "Uzr so'rayman..."

- Bugungi uchrashuv haqida to'xtalsangiz...

- Avvalambor, OAV xodimlarini o'tgan bayramlari bilan tabriklayman. Bugungi va uch kun avvalgi «Yashnobod»ga qarshi va bugungi mag'lubiyat uchun uzr so'rayman. Bugun ham «Lokomotiv» kabi yuqori saviyadagi jamoaga qarshi o'ynadik va bugun ham g'alaba qozonishni xohlagandik. Bugungi mag'lubiyatda balki men aybdorman, chunki mag'lubiyat murabbiyniki bo'ladi. Markaziy himoyada qo'pol xatolar qildik. Mag'lub bo'ldik, lekin futbolchilarimga mehnat qilganlari uchun rahmat deyman. Menimcha, bugungi bahsda durang adolatli natija bo'lardi.

- “Dinamo”ning uy uchrashuvlaridagi yoqimli ananasi buzildi...

- Biz uyimizdagi uchrashuvlarda mag'lubiyatga uchramay, o'z darajamizdan yuqori sakray olgandik. Yani, hamma bizni Pro-Liga klubi, autsayderga aylanadi, deganda hattoki 3-o'rin uchun kurashib, “planka”ni yuqoriga ko'targandik. Birinchi davrani yil boshida kimdir menga turnir jadvali o'rtasida tugatasilar deganida, men bunga qarshi bo'lmasdim. Hozir esa “planka”ni ko'targanimiz uchun davrani yanada yuqoriroq o'rinda yakunlashni istagandik.

- Jamoaning bugungi mag'lubiyatida kubokdagi “Yashnobod”ga qarshi mag'lubiyat tasiri qay daraja bo'ldi?

- “Yashnobod”ga qarshi kubok uchrashuvida men o'yin amaliyoti bo'lmagan zaxira futbolchilarga imkoniyat berdim, ammo ular ishonchni oqlay olishmadi. O'shanda jamoamiz o'yindan oldin raqibni ruhan mag'lub etgandi. Bunda mening ham aybim bor, jamoani har taraflama tayyor qila olmaganim uchun. Tarkibimizda o'zgarishlar bo'lishi aniq. Ammo, goleadorlar ham, yaxshi saviyadagi futbolchilar ham katta pullar evaziga kelishi mumkin. Biz esa faqat imkoniyatimiz darajasida bo'lgan futbolchilarni taklif eta olamiz.

- Bugungi uchrashuvda hakamlar o'yin tizginini qo'ldan boy berishdi...

- Bugungi hakamlarga jiddiy etirozim yo'q, faqat bitta etirozim - hali qo'shimcha vaqt tugab bo'lmay biz jarima tepishimiz kerak bo'lganda o'yinni tugatib qo'yishdi. Eshitishimcha, bugungi hakamni OFK vakillari kuzatishgan. Bahoni o'shalar berishadi. U yana bir vaziyatda avval jarima zarbasi belgilamoqchi bo'ldi, lekin keyin o'yinni davom ettirdi. Penalti borasida hali aniq fikr ayta olmayman.

- Davralar oralig'ida tarkibda jiddiy o'zgarishlarga qo'l uriladimi?

- Bugun raqib jamoa safida Lutfulla To'raev va Anvar G'ofurov tajribali futbolchilar sifatida o'yinni boshqarishdi, yoshlar ular ortidan ergashdi. Ular maydonda murabbiyning barcha ko'rsatmalarini bajarishdi. Biz ham himoya, tayanch yarim himoyasi, hujumni kuchaytira oladigan futbolchilarni topshimiz va raqobatni oshirishimiz kerak.