Davron Fayziev: "Biron-bir narsani o'zgartirish kerakdir"

-   Ikkinchi uchrashuvda ham yirik hisobda mag'lubiyatga uchrash bu yaxshi alomat emas. Bugungi o'tkazib yuborilgan gollar hammasi o'zimizning xatolar va yana xatolar evaziga bo'ldi. Boshlanishi yomon emas, golgacha hammasi ko'ngildagidek edi. Godan so'ng, yigitlar ruhan “sinib” qolishdi... Bilmadim nimaga bunday bo'ldi, o'zim ham tushunmadim.

Hakamlar haqida esa gapirishni ham xohlamayman. Jarima maydonchasi ichidagi erkin zarba keyin esa penalti, tushunmadim. Hammasi biz tomonga bo'ldi... Bu gaplarim bilan o'zimni oqlash niyatim yo'q. Lekin baribir ularning harakatidan ko'nglim to'lmadi. Nima keragi bor edi bunday qilib. 

-   O'tgan uchrashuvdagi yirik mag'lubiyatdan so'ng, jamoa azolarini ruhan o'z holatiga qaytarish oson bo'lmadi, dedingiz...
-   Ha, shunday. Bu yog'i ham oson kechmasligi aniq. Keyingi raqiblarimizni qarang, “Lokomotiv”, “Navbahor”...
Yuqorida bolalar haqida gapirdim, aslida birinchi va ikkinchi turlardagi yirik mag'lubiyat har qanday murabbiyni ham ruhan tushkun kayfiyatga solib qo'yadi. SHuning uchun bugungi o'yin haqida aniq bir gap aytishga so'z ham topa olmayapman. Endi uyga borgach, tahlil qilamiz, o'yin video tasmasini ko'ramiz. Xullas, bir to'xtamga kelamiz.
Ikki uchrashuvdagi natijaga kelsak, hech kimni ayblay olmayman. Hamma ayb va masuliyatni o'z zimmamga olaman. Balki jamoada nimanidir o'zgartirish kerakdir. Yoki o'zim biroz dam olishim zarurdir. Vaqt nuqtai nazaridan olib qarasak esa chempionat allaqachon boshlanib ketdi. Vaqt esa oliy hakam. 


"SHo'rtan" klubi matbuot xizmati