Coca Cola Superligasi. Eng ko'p muxlis vodiyda, eng kami esa...

Albatta, ko'rsatkichlar nisbiy sanaladi, chunki bir muxlis jamoasi ishtirokidagi barcha o'yinga kirishi mumkin yoki kishilar o'zgarib turishi mumkin. SHu bois, faqat stadionga kelgan ishqibozlar keltirgan son bo'yicha reyting shakllantirdik.

Yarim mavsum davomida "Navbahor" ishtirok etgan uchrashuvlarga eng ko'p muxlis tashrif buyurgan. Namanganliklarning mezbon va mehmon sifatidagi o'yinlariga jami 139400 tomoshabin kelgan. 

"Neftchi" qatnashgan uy-safar o'yinlariga esa jami 108601 tomoshabin qadam ranjida qilgan. Bu borada uchinchi ko'rsatkich "Buxoro"ga tegishli. Ko'hna shahar jamoasi qatnashgan bahslarni 66017 nafar muxlis kuzatgan.

Eng yomon ko'rsatkich esa "Surxon"ga tegishli. O'zi tegishli bo'lgan viloyatda o'namayotgan klub ishtirokidagi bellashuvlar jami 22055 nafar odamni jalb qilgan. OKMKda bu ko'rsatkich 30719 kishini tashkil etadi. "So'g'diyona" qatnashgan barcha o'yinlarga esa 39908 nafar muxlis kelgan.

SHuningdek, o'z maydonidagi o'yinlarni tomoshabin jalb qilishda ham ro'yxat unchalik o'zgarishga uchramagan. Namangan markaziy stadioniga jami 89378 tomoshabin kelgan bo'lsa, "Neftchi" mezbonligidagi bahslarga 77573 nafar muxlis tashrif buyurgan. 

Quyi pog'onadagi "Surxon"ning Toshkentdagi o'yinlarini jami 3617 muxlis kuzatgan. "Olimpik" mezbonligidagi bahslarni esa jami 6604 kishi tomosha qilgani qayd etilgan.

Ilk davrada eng ko'p tomoshabin "Neftchi" — "Navbahor" uchrashuviga tashrif buyurdi. Farg'onadagi to'qnashuvni 19191 nafar ishqiboz kuzatgan.

Eng kam muxlis esa "Olimpik" — OKMK uchrashuviga tashrif buyurgan. Uchrashuvni 212 kishi stadiondan kuzatgan.

Oqil Abdubarnoev tayyorladi.