Chin insoniylik namunasi: Grilish onasini yo'qotgan oilaga yordam berdi va muxlislarga murojaat qildi

"The Sun" nashrining xabar berishicha, ingliz futbolchisi fojiali vaziyatga tushgan oilaga ko'mak berdi: 55 yoshli Mishel Yeyts 4 aprel kuni to'satdan vafot etgach, uning yaqinlari dafn marosimi xarajatlarini qoplay olmay qolishdi.

Grilish voqeadan xabar topgach, marhumaning qarindoshlari ochgan GoFundMe sahifasiga 1000 funt sterling o'tkazdi. Qo'shimchasiga u o'zining Instagram sahifasida mablag' yig'ish havolasini joylashtirdi va obunachilaridan og'ir ahvolga tushib qolgan oilani qo'llab-quvvatlashlarini so'radi.

Grilish va uning jamoasi "Manchester Siti" 27 aprel kuni "Uembli" stadionida "Nottingem Forest" jamoasini ishonchli tarzda mag'lub etib, Angliya Kubogi finaliga chiqdi.

Jek Grilish joriy mavsum "shaharliklar" safida barcha musobaqalarda 31 o'yinda maydonga tushib, 3 ta gol urdi va 5 ta golli uzatmani amalga oshirdi.

Eslatib o'tamiz, Jek Grilish "Chelsi" bilan bahsda xatoga yo'l qo'ygan horg'in kayfiyatdagi Abduqodir Husanovni eng ko'p qo'llab-quvvatlagan futbolchi bo'lgandi. Angliya terma jamoasi azosi uzoq davom etgan motivacion nutqida Abduqodirga boshni baland tutish va xatoni unutishni, hali hammasi oldinda ekanligini uqtirgan, yosh hamkasbining ko'nglini ko'targan edi.