"CHelsi" sobiq o'yinchisi Pochettino jamoasining rivojlanishi uchun nimalar kerakligini tushuntirib berdi

"Natijalar, albatta, achinarli, ammo jamoaning o'rtacha yoshi juda va juda kichik hamda bu jamoa qaytadan yig'ilgan. Ko'pgina o'yinchilarning futbolda hali ko'p ham tajribasi yo'q. Ularga APLga moslashish uchun vaqt kerak – bu juda qiyin liga.

 Biroq istedodlar ko'p. Men ular bilan birga mavsumoldi yig'inga bordim, mashg'ulotlarini ko'rdim va katta taassurot oldim. Lekin, albatta, vaqt va sabr-toqat talab etiladi va bu yosh futbolchilar rivojlanishi kerak.

Muvaffaqiyatli davrlarimizda jamoa yadrosi bor edi va biz unga bir yoki ikkita o'yinchini qo'shardik, keyin ularni tizimga va klubga moslashishi ancha osonlashardi. Agar juda ko'p o'zgarishlar bo'lsa, bu ligani o'rganish va tajriba orttirish uchun haqiqatan ham vaqt kerak bo'ladi. Ham yaxshi, ham yomon tajriba kerak – futbolda hammasi oson emas", – dedi Gari Kexill.

Eslatib o'tamiz, Gari Kexill "aristokratlar" safida 290 ta o'yin o'tkazib, 25 ta gol urgan, ikki karra Angliya chempioni bo'lgan va CHempionlar Ligasida g'olib chiqqan.