Championat.asia tarixda birinchi bo'lib Superliga o'yinlaridan highlights tayyorlash huquqini sotib oldi

Bugun, 31 mart kuni O'zbekistondagi birinchi raqamli futbol portali Championat.asia sayti O'zbekiston Professional futbol ligasi bilan hamkorlik shartnomasini imzolashdi.

Unga ko'ra, Championat.asia 2021 yilgi mavsum yakuniga qadar Coca-Cola Superliga uchrashuvlaridan 10 daqiqagacha bo'lgan highlights’lar tayyorlash va ularni ijtimoiy tarmoqlar, veb-sayt hamda messenjerlarga joylash huquqiga ega bo'ladi. Bungacha mazkur huquq O'zPFL hamda “Sport” telekanaliga tegishli edi. Endilikda ular yoniga Championat.asia sayti ham qo'shildi.

highlights - bu futbol o'yinlarining eng qiziqarli vaziyatlari, gollar, xavfli vaziyatlar va boshqa holatlar aks etgan video.

"O'zbekiston Superligasi bahslari har yilgidan qiziqarli kechmoqda. Saytimiz professional yo'ldan borib xuddi xorijda bo'lgani kabi o'yin sharhlarini (highlights) internet tarmog'ida namoyish etish huquqini sotib oldi. Bu o'zbek futboli tarixida hech qachon bo'lmagan ekan, birinchi bo'lganimizdan faxrlanamiz. Kelishuvda o'yindan keyingi matbuot anjumani va mikst zonalarda flesh intervyular olish kabi ustunliklar ham mavjud. O'ylaymanki hamkorligimiz faqat bu yil bilan cheklanib qolmaydi va uzoq yillar davom etadi", - deydi Championat.asia sayti bosh muharriri Narzulla Saydullaev.

O'zbekiston Superligasi o'yinlari sharhlarini Championat.asia saytining youtube.com   va sportrecs.com  saytlaridagi kanallari orqali kuzatib boring.