"Bunyodkor"da uchta turdan keyin yana bosh murabbiy o'zgaradimi?

Kecha, 10 may kuni "Korostichenko va Maqsudovga tegmang!" nomli maqola yozgandim. Bugun esa "Bunyodkor" rahbari Maqsudovni ishdan haydadi va menimcha qo'pol xatoga yo'l qo'ydi.

O'zi kechagi maqola ostida "zakaz" deganlar juda ko'pchilini tashkil etadi. Agar yil boshida Viktor Karpenko bosh murabbiy bo'lganida va "Bunyodkor" "Olimpik"ka 1:5 hisobida yutqazganida ham kechagi maqolani yozgan bo'lardim. Sarlavhasi boshqacha bo'lardi: "Korostichenko va Karpenkoga tegmang!".

Maqsudov ham, Karpenko ham men uchun bir darajadagi insonlar. Unisini ham, bunisini ham sobiq terma jamoamiz azosi sifatida taniyman.

Bugungi yig'ilishda "Bunyodkor" klubi rahbari Mehriddin Abdullaev quyidagi fikrni bildiribdi: "Jamoamizning so'nggi o'yinlaridagi natijalaridan juda xafaman. Oxirgi uch uchrashuvda bor-yo'g'i bir ochko qo'lga kiritilgani yomon ko'rsatkich".

O'tgan yilgi mavsumdan keyin "Bunyodkor"ni tark etgan futbolchilarni yodga olamiz: Abdulla Abdullaev, Xurshid G'iyosov, Lutfulla To'raev, Nurillo To'xtasinov, Mirjahon Mirahmadov, SHahboz Erkinov va boshqalar. Mana shu futbolchilar klubdan ketayotganda klub rahbari nahot 2022 yilgi mavsumda 2021 yilgisidan ko'ra kamroq ochko to'plashini bilmagan bo'lsa?

Sarlavhaga qaytamiz. "Bunyodkor"ning keyingi uchta tur taqvimi:

16 may
AGMK - "Bunyodkor"

24 may
"Bunyodkor" - "Nasaf"

29 may
"Surxon" - "Bunyodkor"

Ikkitasi sovrinli o'rinlar uchun kurashyotgan jamoa, bittasi quyi pog'onalarda borayotgan klub. Xo'sh, sizningacha mana shu uchta turda "Bunyodkor" nechi ochko oladi? Men Karpenkoga ham achinaman, sababi mana shu uchta turda 3 ochkodan ko'p to'play olmasa, klub rahbari uni ham ishdan haydashi mumkin. Mantiqan to'g'rimi? To'g'ri.

Yana bir gap: Agar ikki-uchta tur ichida "Lokomotiv" bosh murabbiyi Denis Korostichenko ham istefoga chiqarilsa, "Bu mavsum yoshlarga ishonch bildiramiz" degan futbol klubi rahbarlaridan 10 kilometr uzoqdan o'tib ketinglar.