“Bunyodkor”: Qo'qonlik muxlislarga tashakkur!

Qiziqarli va murosasiz kechgan “Qo'qon-1912” - “Bunyodkor” uchrashuvida Eldor SHomurodov va SHahzodbek Nurmatov tomonidan kiritilgan gollar “qaldirg'ochlar”ga 2:0 hisobidagi g'alabani taqdim etdi.

9 may kuni bo'lib o'tgan mazkur bahsda har ikkala jamoa azolari stadionga yig'ilgan ko'p ming sonli tomoshabinlar uchun chiroyli o'yin ko'rsatishga harakat qilishdi. Bahs davomida futbolchilar tomonidan ijro etilgan har bir chiroyli harakat va uyushtirilgan kombinaciyalarni muxlislar olqishlab turishdi. “Bunyodkor” vakillari gol kiritgan vaziyatlarda ham ishqibozlar maydondagi chiroyli harakatlarni beetibor qoldirishmadi. Uchrashuv yakuniga etgach esa qo'qonlik futbol ixlosmandlari “qaldirg'ochlar”ni qarsaklar bilan kuzatib qo'yishdi. Bir kun avval yoshlar ligasi doirasida ushbu jamoalar vakillari ishtirokida uchrashuvda ham shu kabi holatga shohid bo'lgan edik.

Bunday ajoyib muhitda to'p tepish har bir futbolchiga zavq bag'ishlashi shubhasiz. Yuksak madaniyat va tartibli ravishda muxlislik qilgan, eng asosiysi, chiroyli futbolni qadrlab, futbolchilarni olqishlar bilan kuzatib qo'ygan qo'qonlik muxlislarga “Bunyodkor” futbol klubi minnatdorchilik izhor qiladi.

“Bunyodkor” - muxlislar uchun o'ynaydi!”