"Bunyodkor" - "Paxtakor": uchrashuv haqida malumotlar

Ushbu jamoalar o'rtasidagi o'yinlar oxirgi yillarda ligamizda yana bir keskin qarama-qarshilikni keltirib chiqardi. So'nggi 14 yilda chempionatimizda faqat ushbu jamoalar oltin medallarga ega chiqishdi.

Tayyorgarlik

Jamoamiz ayni paytda har 4 kunda uchrashuv o'tkazishga majbur bo'lmoqda. "Metallurg" bilan dushanba kungi bellashuvdan keyin darhol navbatdagi bahsga tayyorgarlik boshlandi. "Bunyodkor" esa "Obod" bilan o'tgan shanba kungi uchrashuvdan keyin hozirlik ko'rish uchun ko'proq vaqtga ega bo'ldi.

Qarama-qarshilik

Oliy ligada jamoalar 18 bor to'qnash kelishgan. Ularning 6tasida "Bunyodkor", 4tasida "Paxtakor" zafar quchgan. 8 o'yin durang bilan tugagan. Raqib 20 bor, jamoamiz 16 marta darvozalarga to'p kiritgan. Safardagi bellashuvlarda 5 bor mezbonlar, 2 marta "Paxtakor" g'olib chiqqan. Yana 2 o'yinda durang qayd etilgan.

O'yin rasmiylari

Uchrashuvni Aziz Asimov boshchiligidagi hakamlar boshqarishadi. Hozirgacha Asimov oliy ligada jamoamiz ishtirokidagi 12 bellashuvda ishlagan. Ularning 10tasida g'alaba qozongan "sherlar" bir martadan durang va mag'lubiyatga duch kelishgan.

“BUNYODKOR” - “PAXTAKOR”

Hakamlar: Aziz Asimov (Toshkent), Andrey Snetkov (Toshkent viloyati), Andrey Capenko (Toshkent viloyati), Ravshan Kopadze (Farg'ona).

Nazoratchi: Arslon Hotamov (Toshkent).

O'zPFL vakili: Ahrol Inoyatov (Toshkent). 

"Bunyodkor" va "Paxtakor" jamoalari o'rtasidagi uchrashuv 29 aprel, juma kuni "Bunyodkor" stadionida 19:00da boshlanadi.