Bundesliga. "Bavariya" uyda ochko yo'qotdi, "Borussiya D" ettita gol urdi, ECHLda o'ynayotgan "SHalke-04" o'ziga kela olmayapti

Tur sensaciyasi Myunxenda kuzatildi. Mamlakatning oxirgi 6 yildagi chempioni va joriy mavsum ham peshqadamlik qilayotgan "Bavariya" o'z maydonida ikkinchi o'ntalikda borayotgan "Augsburg"ni mag'lub eta olmadi.

Tarkibda rotaciyaga qo'l urgan, ayniqsa chap qanot himoyasida aslida yarim himoyachi hisoblangan Goreckani bir bo'lim o'ynatgan Kovach, ikkinchi taymda Alabani tushirishga majbur bo'ldi. CHunki Gorecka o'zi uchun butkul yangi nuqtada kirishib ketolmadi. SHuningdek, Robert Levandovskiga ham dam berildi. Frank Riberi va Tiago Alkantara esa zaxiradan o'yinga qo'shildi. Aynan shu jihatlar va tig'iz taqvim tufayli jamoa shu kuni o'zining haqiqiy futbolini namoyish etishga qiynaldi. Qaysidir jihatdan raqibni munosib baholay olinmagani ham jamoaga yakunda qimmatga tushdi. Garchi jamoa kutilganidek o'ynolmagan bo'lishiga qaramasdan, gol urish va hisobni yirik ko'rinishga keltirish uchun keragidan ortiq vaziyatlar sodir etdi. Ammo vaziyatlardan foydalanishda kelganida jamoa oqsadi. Hisob qaltis bo'lishiga qaramasdan "Bavariya" juda ortiqcha ishonch bilan o'ynagani yakunda o'ziga pand berdi. Jamoa to'pni keragidan ortiq ko'p o'z jarima maydonchasi oldida nazorat qildi. O'yin yakunlanishiga 3 daqiqa qolganida raqib burchak zarbasidan unumli foydalandi. Noyerning to'pga chiqishdagi xatosidan so'ng "Bavariya" tarbiyalanuvchisi Feliks Gyotce sobiq jamoasini jazoladi. Natijada jamoa o'z uyida qimmatli 2 ochkoni qo'ldan chiqardi.

Kovach qo'l ostida jamoa ilk marotaba g'alaba nashidasini surolmadi. Ammo shunga qaramay jamoa 13 ochko to'plagan holda birinchi pog'onadan o'rin olgan. Myunxenliklarning eng yaqin taqibchisi "Verder" hisobida 11 ochko mavjud. Uchinchi o'rinda esa "Gerta" bormoqda.

Aynan shu kuchli-uchlikni yakunlab turgan jamoalar kecha o'zaro bellashishdi. Bremenda mehmon bo'lgan poytaxtliklar qiziqarli kechgan bahsda 1:3 hisobida imkoniyatni boy berishdi. Dastlab birinchi bo'lim startida Martin Xarnik tablodagi hisobni ochishga muvaffaq bo'ldi. Tanaffus oldidan esa Milosh Velikovich oradagi farqni ikkitaga oshirdi.

Ikkinchi bo'limda mehmonlar o'yinga ancha jahl qo'shishdi va o'rtadagi farqni qisqartiruvchi golni urishdi. Yavayro Dilrosun tomonidan kiritilgan gol "Gerta"ga o'yinni saqlab qolish uchun umid bag'ishlagandi. Biroq "Gerta" darvozasi tomon belgilangan penalti hammasini chippakka chiqardi. Maks Kruze "nuqta"dan adashmagani yakunda "Verder"ga muhim g'alabani taqdim etdi. Natijada jamoa 11 ochko to'plagan holda ikkinchi o'ringa joylashib oldi.

Gannoverga mehmon bo'lgan "Xoffenxaym" mezbonlarni ayab o'tirmadi. Yulian Nagelsmann jamoasi o'yinda katta ustunlikka ega bo'ldi va birinchi bo'limda buni hisobda ham aks ettirishni uddaladi. Tanaffusdan so'ng "Xoffenxaym" tezkor gol urib, mezbonlarni o'yindan chiqarib yubordi. "Gannover" faqatgina 55-daqiqa belgilangan penalti tufayli raqib darvozasiga yo'l topdi. Undan ortig'ini uddalashga ularni kuchi etmadi. Uchrashuvga hakam tomonidan qo'shib berilgan daqiqalarda esa Ishak Belfodil tomonidan kiritilgan gol o'yinga oxirgi nuqtani qo'ydi. SHu tariqa "Xoffenxaym" mavsumdagi ikkinchi g'alabasini nishonladi va vaqtincha 5-o'ringa ko'tarilib oldi.

O'tgan mavsumni ajoyib tarzda o'tkazgan, joriy yilni juda muvaffaqiyatsiz boshlagan "SHalke" ketma-ket beshinchi mag'lubiyatini tan olishga majbur bo'ldi. Domeniko Tedesko boshqaruvidagi gelzerkirxenliklar "Frayburg" maydonida mezbonlarga taslim bo'lishdi.

Mamlakatning nomdor jamoalaridan biri hisoblangan, ammo hozircha ishlari unchalik yurishmayotgan "Bayer" safarda "Fortuna Dyusseldorf"ni kichik hisobda mag'lub etdi. Kevin Follandning dubli leverkuzenliklarga juda zarur bo'lgan 3 ochkoni taqdim etdi. "Fortuna" esa o'z maydonida uchta o'yinlik mag'lubiyatsiz seriyasiga barham berdi.

Mavsumni ikkita g'alaba bilan boshlagan "Volfsburg" oxirgi 3 turda yutuq nimaligini bilmay kelmoqda. Bu safar "bo'rilar" huddi o'zlari kabi startni yaxshi olgan, ammo so'nggi turda engilgan "Maync" mehmoni bo'lishdi. Bu to'qnashuv Bundesliganing 6-turida gol kiritilmagan yagona uchrashuv bo'ldi. Natijaga mos ravishda har ikki jamoa turnir jadvalida yonma-yon 6 va 7-o'rinlarda borishmoqda.

"Borussiya D" o'z maydonida elitaga qaytgan "Nyurnberg"ni qabul qildi. Bir kun oldin "Bavariya"ning ochko yo'qotgani dordmundliklarning kayfiyatlarini ko'tarib yuborgan ko'rinadi. Lyusen Favr shogirdlari raqib darvozasini oz emas, ko'p emas naqd 7 marotaba aniq nishonga olishdi va o'z darvozalari daxlsizligini saqlab qolishdi. Uchrashuvda jamoaning "yuragi" Marko Roys ikkita gol urdi va bitta golga assistentlik qildi. SHu tariqa, "sariq-qoralar" Kovach boshchiligidagi "Bavariya" bilan farqni ikkita ga qisqartirishdi. To'plar nisbatini esa asosiy raqobatchilarinikidan yaxshiroq qilib olishdi.

O'tgan hafta Evropa ligasi doirasida "Red Bull"ga o'z maydonida imkoniyatni boy berib qo'ygan, ketidan dam olish kunlari Bundesliga doirasida "Ayntraxt F" bilan durang (1:1) o'ynagan "Leypcig" bu safar "SHtutgart"ni qabul qildi va chempionatdagi ikkinchi g'alabasini tantana qildi.

Turning so'nggi uchrashuvi "Borussiya M" va "Ayntraxt F" jamoalari o'rtasida o'tkazildi. Unda myunxengladbaxliklar Plea, Torgan Azar va Elvedilarning gollari evaziga 3:1 hisobida g'alaba qozonishdi.

Bundesliga 5-turida qayd etilgan natijalar.

Bundesliga 5-turi raqamlarda:

- Bundesliganing amaldagi kumush medal sohibi "SHalke-04" ketma-ket 5ta o'yinda mag'lubiyatga uchradi;
- "Gerta" darvozasiga ketma-ket beshinchi o'yindirki hakamlar penalti belgilashmoqda;
- Bu turga kelib chempionatda ochko yo'qotmagan jamoa qolmadi;
- Ortda qolgan turda jami 27ta gol urildi. Bu har bir bahsga o'rtacha 3tadan gol degani.

Bundesliga turnir jadvali.

Beshinchi turdan so'ng to'purarlar ro'yxati.