Bugun futbol. "So'g'diyona" - "Nasaf"

Musobaqa jadvalida "So'g'diyona" 16 ochko bilan 11-o'rinda bormoqda. "Nasaf" esa 23 ochko jamg'argan va 8-o'rinni egallab turibdi. Buyog'iga "So'g'diyona" elitada qolish uchun kurashadi, "Nasaf" esa kuchli oltilikka kirishga harakat qilib ko'radi.

"So'g'diyona" o'z maydonida "Buxoro"ni 3:0 hisobida mag'lub etganidan beri keyingi uchrashuvlarda g'alaba qozona olmadi. Jamoa shundan so'ng beshta uchrashuvda maydonga tushib, to'rt marta imkoniyani boy berdi va bir bor durang qayd etdi. Qizig'i shundaki, mana shu oxirgi beshta o'yinda raqib darvozasiga atigi bitta to'p kiritildi.

Bugungi bahs "So'g'diyona" uchun uydagi 10-uchrashuv bo'ladi. Bu jamoa o'z maydonida faqat ikki bor zafar quchgan: "Navbahor" va "Buxoro" ustidan. "So'g'diyona" uy uchrashuvlarida 9 ochkoli bo'lgan. To'plar nisbati 9-10.

Oxirgi paytlarda "Nasaf"ning hech omadi kelmayapti. Qarshiliklar o'tgan turda yana mag'lubiyatga uchrashdi. Jamoa o'z maydonida AGMKga 0:2 hisobida yutqazib qo'ydi. "Nasaf"ning safarda ham ishlari yurishmayapti. CHunki bu jamoa safar bellashuvlarida faqat bir marta g'alaba qozongan. "Nasaf" 3-turda "Qizilqum"ni mag'lub etib qaytgan.

Ro'ziqul Berdiev shogirdlari umumiy hisobda safarda 9 bor maydonga tushib, bitta g'alaba, 5 durang va 3 mag'lubiyat bilan 8 ochko to'plashgan. To'plar nisbati: 6-9. Birinchi davrada Qarshida bo'lib o'tgan o'yinda "So'g'diyona" kutilmaganda 2:1 hisobida zafar quchgan. Bugun maydon egalari o'sha g'alaba tasodif emasligini isbotlashga harakat qilishadi.