Bugun futbol. "Qizilqum" - "Paxtakor"

Bu yilgi chempionatda hali g'alaba qozonmagan "Qizilqum" o'z maydonida "Paxtakor"ni qabul qiladi. Turnir jadvalida "Paxtakor" 12 ochko bilan birinchi o'ringa ko'tarilib oldi. "Qizilqum" esa 1 ochko to'plagan holda 13-o'rinda boryapti. 

Navoiyliklar beshta turning bittasida durang o'ynab, to'rt bor mag'lub bo'lishdi. Yagona ochko safarda "Mashal" bilan bahsda qo'lga kiritilgan. Karantindan so'ng "Qizilqum"ning omadi kelmayapti. Jamoa ikkita o'yinda mag'lub bo'ldi. Tachmurad Agamuradov shogirdlari uyda AGMK va safarda "Qo'qon-1912"ga qarshi imkoniyatni boy berishdi. Har ikkala o'yinda "oltin izlovchilar" gol kirita olishmadi. 

"Paxtakor" hisobida esa to'rt g'alaba va bir mag'lubiyat bor. "SHerlar" karantingacha qatorasiga uchta bellashuvni yutuq bilan yakunlashdi. Etiborlisi, uchala g'alaba ham uydagi bahslarda qo'lga kiritildi. So'ngra jamoa Jizzaxga safar qilib, 0:1 hisobida imkoniyatni boy berdi. Uydagi oxirgi o'yinda esa "Bunyodkor" 5:0 hisobida tor-mor keltirildi. 

Bugungi bellashuv "Paxtakor" uchun safardagi ikkinchisi bo'ladi. Jamoa o'tgan turdagi ishonchli g'alabadan so'ng ancha o'ziga kelib olgan va bugungi o'yinda ham favorit sifatida qaralyapti. Lekin o'z navbatida maydon egalariga ham ochko kerak. Zero Agamurodov qatorasiga uchinchi mag'lubiyatga rozi bo'lmasa kerak. 

P.S. Soat 20:15da boshlanadigan uchrashuvni "Mahalla" telekanalida to'g'ridan to'g'ri kuzatib boring.