Bugun futbol. "Neftchi" - "Obod"

Oliy liga. 10-tur. 12 may
Neftchi (Farg'ona) – Obod (Toshkent)
Hakamlar: B. Namozov (Toshkent), A. Sidorov (Toshkent), D. Saylalov (Toshkent), SH. Nasibullaev (Namangan)
Nazoratchi: D. Roman (Toshkent).
O'zPFL vakili: V. Letkin.

O'yindan nima kutyapmiz? Bir so'z bilan aytganda, turnir jadvalida oxirgi o'rinda borayotgan jamoalarning o'zaro bahsi. Ikkala jamoa ham 6 ochkodan to'plagan holda 14-15 o'rinlarni bo'lishib turishibdi. Qizig'i shundaki, "Neftchi" ham, "Obod" ham 9tadan o'yin o'tkazib, bir bor g'alaba qozongan. Ikkala jamoa hisobida uchtadan durang va beshtadan mag'lubiyat mavjud. "Neftchi" faqat to'plar nisbatiga ko'ragina yuqori o'rinda turibdi.

Fakt: "Neftchi" joriy mavsum oliy ligadagi yagona g'alabasini safarda qo'lga kiritgan. Jamoa o'z maydonida to'rtta uchrashuvda maydonga tushib, ikkita durang va ikki mag'lubiyat qayd etgan. Farg'onaliklar o'z uylarida hali g'alaba qozongani yo'q. "Neftchi" "Paxtakor" va "Olmaliq" bilan durang o'ynab, "Qo'qon-1912" hamda "Bunyodkor"ga mag'lub bo'lgan.

Fakt: "Obod" ham xuddi "Neftchi" singari o'zining bitta-yu bitta g'alabasini safarda qo'lga kiritgan. Bu jamoa 3-turda "Buxoro"ni 1:0 hisobida mag'lub etib qaytgan. Bugun toshkentliklar safarda oltinchi o'yinda maydonga tushishadi. Avvalgi o'yinlardagi natijalar: bir g'alaba, to'rt mag'lubiyat. "Neftchi" o'z maydonida uchta, "Obod" safarda ikkita to'p kiritgan.

Bilasizmi? "Obod" safar uchrashuvlarida "So'g'diyona" bilan birgalikda eng ko'p gol o'tkazib yuborgan jamoa bo'lib turibdi. Ikkala jamoa ham bir xil 11tadan gol o'tkazgan. Bundan tashqari, "Obod"ning ketma-ket o'yinlardagi g'alabasiz seriyasi oltitaga etdi.

Bilasizmi? "Neftchi" mavsumni qatorasiga oltita g'alabasiz o'yin bilan boshlab, nihoyat 7-turga kelib ilk g'alabasini "So'g'diyona" ustidan qo'lga kiritdi. SHundan keyin jamoa yana oxirgi ikki o'yinni yuta olmadi. O'tgan yil Farg'onada kechgan bahsda "Neftchi" 1:0 hisobida "Obod"ni mag'lub etgan.