Bugun futbol. Lokomotiv - Qizilqum

Bugun «Lokomotiv» o'z maydonida «Qizilqum»ga qarshi bahs olib boradi. Turnir jadvalida «Lokomotiv» 6ta o'yindan so'ng 6 ochko bilan 10-o'rinda boryapti. Jamoa ikki bor g'alaba qozonib, 4 marta mag'lub bo'lgan. To'plar nisbati 6-10.

«Qizilqum» esa atigi 1 ochko to'plagan holda oxirgi o'rinni egallab turibdi. Navoiyliklar hisobida 1 durang, 5 mag'lubiyat bo'lib, to'plar nisbati 3-13. «Qizilqum» bu yil Superligada hali g'alaba qozonmagan uchta jamoadan biri bo'lib turibdi.

Qizig'i shundaki, har ikki jamoa o'z ochkolarini karantingacha dastlabki uch turda yiqqan. «Lokomotiv»ning ikkita g'alabasi uyda «Andijon» va «Buxoro» bilan kechgan bahslarda qo'lga kiritilgan, «Qizilqum» esa safarda «Mashal» bilan durang o'ynagandi.

Karantindan so'ng negadir har ikki jamoaning omadi kelmayapti. «Loko»ning ketma-ket uch mag'lubiyati «Metallurg» (0:3), «So'g'diyona» (1:2), «Bunyodkor» (0:2) bilan o'yinlarda qayd etilgan bo'lsa, «Qizilqum» AGMK (0:1), «Qo'qon-1912» (0:4) va «Paxtakor» (0:2) bilan kechgan bahslarda imkoniyatni boy berdi.

Navbatdagi to'qnashuv oldidan mezbon «Lokomotiv»ning imkoniyatlari yuqori baholanmoqda. Jamoa birinchidan o'z maydonida o'ynaydi. Ikkinchidan tarkibda mahoratli futbolchilar ko'proq. Lekin «Qizilqum» ham yuqoriga intilish uchun astoydil kurash olib bormoqda. Bu esa uchrashuv qiziqarli kechishidan darak beradi.

P.S. «Lokomotiv» - «Qizilqum» bahsini bugun soat 19:00dan boshlab «Oilaviy» telekanalida to'g'ridan to'g'ri tomosha qiling.