Bugun futbol. "Dinamo" - "Mashal"

"Dinamo" mavsumni bir tekis o'tkaza olmayapti. Samarqandliklar bir qarasang safarda "Neftchi" mag'lub etib kelishadi, bir qarasang uyda "Qizilqum"ga yutqazib qo'yishadi. Bugun "Dinamo" o'z maydonida ettinchi o'yinini o'tkazadi. Jamoa shu paytgacha o'zida ikki bor g'alaba qozongan. "Dinamo" Samarqandda "SHo'rtan" va "Buxoro"ni mag'lub etgan. 

Bilasizmi? "Dinamo" o'z maydonida oxirgi uch uchrashuvdan beri g'alaba qozona olmayapti. Jamoa ikki bor durang o'ynagan bo'lsa, bir marta mag'lubiyatga uchragan. 

"Mashal" o'yin tomonlama yaxshi shakllangan jamoa, biroq oxirgi paytlarda ularning ham omadi kelmayapti. Muborakliklar oxirgi oltita o'yinning faqat bittasida g'alabaga erishishdi. "Mashal" o'z maydonida hozir hamma yutishga o'rganib qolgan "Obod"dan ustun keldi. Turnir jadvalining 7-pog'onasida borayotgan "Mashal" hozircha safarda atigi bir marta, "SHo'rtan" ustidan g'alabaga erishgan. 

Bilasizmi? "Mashal" safarda qatorasiga besh o'yindan beri zafar qucha olmayapti: bir durang va to'rt mag'lubiyat. Xususan jamoa oxirgi uchta o'yinida gol ham ura olmadi. "So'g'diyona" - "Mashal" 3:0, "Nasaf" - "Mashal" 1:0, "Qizilqum" - "Mashal" 2:0.