Bugun 19:20. BAA - O'zbekiston

BAA terma jamoasiga iyul oyida kolumbiyalik Xorxe Luis Pinto bosh murabbiy etib tayinlangan edi. O'z paytida Gonduras va Kosta Rika terma jamoalari bilan jahon chempionatida ishtirok etgan ushbu murabbiy BAA terma jamoasini ham mundialga olib borishga vada bermoqda.

Unga O'zbekiston terma jamoasida Ektor Kuperga yordam bergan murabbiy Muhammad Fayoz yordam bermoqda.

Bosh murabbiy O'zbekiston bilan bahsga 29 nafar futbolchisini chaqirgan. Ular orasida uch nafar mahalliylashtirilgan futbolchilar ham bor. Bular Kayo Kanedo (Braziliya), Fabio de Lima (Braziliya) va Sebastyan Talyabue.

Fabio de Lima BAA chempionatining 2014/15 yilgi mavsumida O'zbekiston fuqarosi sifatida o'ynagandi. Ammo braziliyalik futbolchi qaerda, qachon va qay tartibda O'zbekiston Respublikasi fuqarolik pasportiga ega bo'lgani sirligicha qolmoqda. Malumot uchun, 2014 yilning oktyabr oyida saytimiz orqali mazkur fuqarolik pasporti soxta bo'lib chiqqani haqida xabar berilgan edi.

Argentinada tug'ilgan Sebastyan Talyabue ham BAA fuqaroligini oldi va ilk bor terma jamoa safida maydonga tushishga yaqin.


BAAning O'zbekiston bilan o'yinga chaqiruv olgan futbolchilar ro'yxati:

Ali Xasif, Xolid Issa, Odil Al Husani, Muhammad Bargxash, Abdulaziz Haykal, Xalifa Al Hammadi, Muhammad Marzuq, Ismoil Ahmad, Volid Abbos, Faris Juma, Yussuf Jobir, Salim Rashid, Hamis Ismoil, Majid Surur, Tariq Ahmad, Muhammad Al Attas, Ahmad Barman, Fabio de Lima, Jassim Yoqub, Bandar Al Ahbabi, Xalfan Muborak, Xolid Bavazir, Tahnun Al Zaabi, Halil Al Hammadi, Kayo Kanedo, G'arib Abdulloh Suhail, Ali Mabhut, Ahmad Halil, Sebastyan Talyabue.

O'zbekiston terma jamoasining BAA bilan o'yin uchun futbolchilar ro'yxati:

Darvozabonlar: Eldorbek Suyunov ("Paxtakor"), Abduvohid Nematov ("Nasaf"), Rahimjon Davronov ("Mashal")

Himoyachilar: Rustamjon Ashurmatov ("Kvandju", Janubiy Koreya), Igor Golban ("Navbahor"), Islomjon Qobilov ("Bunyodkor"), Ibrohimhalil Yuldashev ("Bunyodkor"), Murod Holmuhammedov ("Qo'qon-1912"), Farrux Sayfiev ("Paxtakor").

Yarim himoyachilar: Otabek SHukurov ("SHarja", BAA), Lutfulla To'raev ("Bunyodkor"), Abrorbek Ismoilov ("Paxtakor"), Aziz Turg'unboev ("Navbahor"), Hojimat Erkinov ("Paxtakor"), Ikrom Aliboev ("Seul", Janubiy Koreya), Akmal Mozgovoy ("Nasaf"), Sanjar Qodirqulov ("Bunyodkor"), Jaloliddin Masharipov ("Paxtakor"), Odiljon Hamrobekov ("Paxtakor"), Dostonbek Hamdamov ("Paxtakor"), Azizjon G'aniev ("SHabab Al Ahli", BAA).

Hujumchilar: SHahzod Ubaydullaev ("Metallurg"), Jasur Yaxshiboev ("SHaxtyor Soligorsk", Belarus), Igor Sergeev ("Paxtakor").

Bu jamoalar hozirga qadar 16 marta o'zaro o'yin o'tkazishgan. Ertangi bahs 17-o'zaro uchrashuvga aylanadi.

Takidlash lozimki, O'zbekiston terma jamoasi bugunga qadar Janubiy Koreya va BAAga qarshi 16tadan o'yin o'tkazgan. Bu bizga eng ko'p raqiblik qilgan jamoalar hisoblanadi. Ertaga BAA bu borada rekordchiga aylanib oladi.

BAA O'zbekistonni 9 marta mag'lub etgan. To'rtta uchrashuvda durang qayd etilgan. Vakillarimiz bu jamoani atigi 3 marta taslim qila olishgan xolos.

Terma jamoamiz BAA bilan 16ta o'yinda 17ta gol urishga erishgan. Eng ko'p gol Server Jeparov hisobida - 3ta. Nikolay SHirshov 2ta gol urgan. Ayni paytda terma jamoamiz tarkibida bo'lib turganlar orasida faqat Igor Sergeev oldin BAA darvozasini ishg'ol qila olgan holos.

O'zbekiston terma jamoasi BAAga qarshi Dubay shahrida bunga qadar 3 marta o'yin o'tkazib umuman g'alaba qozona olmagan ekan - 2ta durang, 1ta mag'lubiyat.

Eslatib o'tamiz, BAA - O'zbekiston uchrashuvi 12 oktyabr kuni Toshkent vaqti bilan soat 19:20da boshlanadi.