Bu o'sha - “tilla soatli” hakam

O'yinni Marat Ismoilov boshchiligidagi hakamlar brigadasi boshqarib bordi. Unga qanotlarda Mamur Saidqosimov bilan Andrey Capenko yordam berishdi. SHunday bo'ldiki, birinchi taymda “Bunyodkor” hisobni tenglashtirishga muvaffaq bo'ldi, biroq Samir Bekrich tomonidan kiritilgan golni hakamlar hisobga olishmadi. Aniqrog'i, qanot hakami Andrey Capenko o'yindan tashqari holat bo'ldi deya bayroqchasini ko'targani bois gol inobatga olinmadi.

Ammo bu vaziyatda hech qanday ofsayd yo'q edi va maydon egalarining goli qoidaga muvofiq kiritilgandi. Lekin Capenkoning xatosi tufayli hisob tenglashmay qoldi. Natijada uchrashuv nazoratchisi Radik Serazetdinov tomonidan qanot hakamiga 4,0 ball (yani, ikki baho) qo'yildi. Endi Capenko uch-to'rt o'yinga chetlatiladi. Bu hakam hozirda laynsmenlik bilan shug'ullanayotgan bo'lsa-da, o'z vaqtida bosh hakamlik ham qilgan. Xususan 2010 yil o'tkazilgan o'smirlar terma jamoamizning Dukentdagi o'rtoqlik bahsida u sekundomerli soatini uyda qoldirib kelgani uchun futbol professori Rustam Akramovning “tilla soati”ni taqib maydonga tushgan va o'yinni boshqarib borgandi. SHundan keyin Akramovning “tilla soati” ham, Capenkoning o'zi ham mashhur bo'lib ketgandi.

X.Xoliqov.