Bolalar futboliga qanot hakamlari kerak

Toshkent shahar bolalar-o'smirlar o'rtasidagi futbol chempionatida 1998 yildan tortib 2003 yilda tug'ilgan futbolchilar ishtirok etishadi. Har bir yosh toifasidagi musobaqada 16ta jamoa ishtirok etadi. Lekin men shu paytgacha nechta o'yinni kuzatgan bo'lsam, birortasida qanot hakamlari ishlaganini ko'rmadim.

Bunda faqat bitta hakam o'yinlarni boshqarmoqda. To'g'ri, yosh bolalar asosan maydonning yarmida to'p tepishayotgani uchun qanot hakamlarisiz ham o'yinni boshqarsa bo'ladi, biroq 1998, 1999 va 2000 yilda tug'ilgan futbolchilar o'rtasidagi bahslarda faqat bir hakamning ishlashi g'alti bo'lyapti. Bilasiz, 2000 yilda tug'ilgan ftubolchilar bir yildan so'ng o'smirlar terma jamoamizga nomzod bo'lishadi. SHunday ekan, hozirdanoq ularni zamonaviy futbolga o'rgatib borgan maqul.

O'yinlarni kuzatar ekanman, ko'pincha bosh hakamlar yon chiziqda yordamchilari bo'lmaganidan keyin qaror chiqarishda qiynalib qolishayotganiga guvoh bo'ldim. Qashqadaryoda bolalar o'rtasidagi turnirlarda qanot hakamlarining ham ishlashini ko'p bor ko'rgandim, ammo Toshkent poytaxt bo'laturib faqat bitta hakamning kun davomida uch-to'rtta o'yinni boshqarishini qanday qabul qilish mumkin hayronmiz.

Toshkentda hakamlar maktabiga asos solingan. Bu erdan ko'plab yosh hakamlar etishib chiqmoqda, ularni aynan mana shunday bolalar ishtirokidagi o'yinlarda pishitib borgan maqul emasmi? Malumki, o'yindan tashqari holat bo'lgan-bo'lmaganini aniqlash bosh hakamga qiyinchilik tug'diradi, shunda u qaror chiqarishda o'z yordamchilariga yuzlanadi. Lekin futbol musobaqasi payti maydonda qanot hakami bo'lmaganidan keyin bosh hakamning bir o'zi nima qilsin? Xullas, bolalar va o'smirlar o'rtasidagi bellashuvlarda manna shunday muammo yuzaga kelgan va o'ylaymizki, Toshkent shahar futbol federaciyasi bu muammoni hal etish ustida kerakli choralarni ko'radi.

Xayrulla Xoliqov.