Bobur Zuhriddinov: "Obod"ning o'rtacha yoshi 26ni tashkil etmoqda"

“Hozirgi kunda futbolchilarimizning jismoniy holati 60-70 foizga mavsumga tayyor holatga kelgan. Lekin bu hali kam. Futbolchilarning bundan uch hafta avvalgi holati yaxshi emas edi. Sekin-asta ularning jismoniy holatini talab darajasiga etkazib olyapmiz. Jismoniy tayyorgarlik birinchi o'rinda bo'lishi kerak. Futbolchining 90 daqiqa bir maromda o'ynay olishi aynan jismoniy tayyorgarlikka bog'liq bo'ladi. Hozir shu ustida ishlayapmiz. Maydonda ham, trenajer zalida ham mashg'ulotlar o'tkazilyapti. Zamonaviy futbol tezkor hujumlarga qurilgan. Hujumga qo'shilgan himoyachining himoyaga tezda qaytishi talab qilinyapti. Ana shu tezkor futbolga mos bo'lish uchun mashg'ulotlar kuchaytirilgan rejimda olib borilmoqda. Tarkibimiz yosh futbolchilardan iborat. Jamoamizning o'rtacha yoshi 26 yoshni tashkil qilmoqda. O'ylaymanki, mavsum boshlanguniga qadar tayyorgarligimiz maromiga etkaziladi”.

Kamoliddin Alimov