Bir o'yinda Najafalievlar ishladi yoxud birinchi ligada hamma narsa bo'lishi mumkin

Xususan Buxoroda kechgan “Nurafshon” – “Mashal-2” bahsini Asker Najafaliev boshqarib bordi. Nazoratchi hakam esa Viloyat Najafaliev edi. Qizig'i, ular shunchaki familiyadosh emas. Balki qarindosh hisoblanadi. O'zbek futbolida Najafalievlarni tanimagan bilmagan muxlis bo'lmasa kerak. CHunki ilgari Sardor Najafaliev degan taniqli oliy liga hakami bo'lgandi. Bugungi kunda Sardor aka nazoratchi sifatida faoliyat yuritmoqda. Asker Najafaliev u kishining to'ng'ich o'g'lidir. Aytishlaricha Viloyat Najafaliev Sardor akaning jiyani bo'ladi.

Kecha “Nurafshon” – “Mashal-2” o'yinini boshqargan hakam Askerga nazoratchi Viloyat Najafaliev 8,5 ball qo'ydi.

Nurafshon – Mashal-2 – 1:2. 35 tomoshabin.
Hakamlar: A. Najafaliev (Toshkent) – 8,5, X. Nabiev (Toshkent) – 8,3, SH. Fayziev (Jizzax) – 8,3, G. Nurullaev - 8
Nazoratchi: V. Najafaliev (Tashkent).
Gollar: R. Islamov (47) – B. Farhodov (57), SH. Ubaydullaev (60).
Ogohlantirishlar: O. SHamsitdinov (77), U. Ramazonov (Nurafshon, 81).

Birinchi liganing 12-turida ham Najafalievlarning to'qnashuviga guvoh bo'lgandik. Bugungi kunda “Andijon” uchun o'ynayotgan Kemran Najafaliev Sardor akaning kenja o'g'lidir. Andijonliklarning o'z maydonida “Orol”ga qarshi o'tkazgan bahsini aynan Asker boshqarib borgandi. Ko'pchilik shu kuni “burgutlar”ning g'alabasini tahmin qilgandi. CHunki Askerning ukasi Kemran shu kuni “Andijon” libosida zaxiradan maydonga tushgandi. Yakunda esa o'yin 1:1 hisobida durang bilan intiho topgandi.  

Ilgari otasining jamoasiga qarshi o'ynagan o'g'illarni ko'rganmiz. Ammo bitta o'yinda qarindosh hakamlarni ishlaganiga endi guvoh bo'ldik. Ko'rib turganingizdek, birinchi ligada hamma narsa bo'lishi mumkin. Yanada ko'prog'i kuting deb qolamiz.

P.S. Aslida Viloyat Najafaliev "Nurafshon" - "Mashal-2" uchrashuvida ishlamagan ekan. SHunchaki PFL saytidagi texnik xato tufayli shunday vaziyat kelib chiqibdi.