Benjamin Uilyams O'zbekiston uchun omadli hakammi?

Ushbu hakam O'zbekistonning turli yoshdagi terma jamoalari ishtirokidagi o'yinlarda 5 marta ishlagan.

2007 yil Olimpiada-2008 saralashi doirasidagi Janubiy Koreyaga qarshi bahsda vakillarimiz 1:2 hisobida mag'lub bo'lishgan. O'sha bahsda Uilyams ishlagan va ikki nafar futbolchimizga qizil kartochka ko'rsatgandi.

2008 yil 19 yoshli futbolchilar o'rtasidagi Osiyo chempionati chorak finalida Ahmad Ubaydullaev boshchiligidagi O'zbekiston yoshlar terma jamoasi Xitoy bilan to'qnash kelgan. Avstraliyalik hakam bu safar Doniyor Usmonovni chetlatgan, jamoamiz esa penaltilar seriyasida g'alabaga erishgandi.

2010 yilgi Osiyo o'yinlari 1/8 finalida O'zbekiston Qatarni 1:0 hisobida mag'lub etgan. Bu safar Uilyamsning qadami biz uchun qutlug' kelgan.

JCH-2014 saralashi to'rtinchi bosqichida Janubiy Koreya bilan Toshkentdagi bahsda 2:2 hisobi qayd etilgan.

Pley-off doirasidagi Iordaniyaga qarshi javob o'yinida 1:1 hisobi qayd etilgan va penaltilar seriyasida yutqazib qo'yganmiz.

Bundan tashqari bu hakam "Paxtakor" klubi ishtirokidagi bitta o'yinda ham ishlagan. 2009 yilgi Osiyo chempionlar ligasi chorak finalida "sherlar" Toshkentda Saudiya Arabistoning "Al Ittihod" klubi bilan durang o'ynashgan - 1:1.

Uilyams "Bunyodkor"ning 6ta o'yinida faoliyat yuritgan. Quyida barcha natijalar keltirilgan:
"Al Ittifoq" - "Bunyodkor" 4:0
"Bunyodkor" - "Al Ittihod" 3:0
"Al Hilol" - "Bunyodkor" 3:0
"Al Vahda" - "Bunyodkor" 1:1
"Buriram" - "Bunyodkor" 2:1
"Al Hilol" - "Bunyodkor" 3:0

Ertangi O'zbekiston va Saudiya Arabistoni o'rtasidagi o'yindan keyin hakamlik haqida umuman yozmaslikka umid qilamiz. Barchasini futbolchilarning o'zi hal qilsin.

Narzulla Saydullaev