Benites "Real"da qoladi, Ronaldu hech qanday ultimatum qo'ymagan

"Benitesga bo'lgan ishonchimiz yuqori. Biz unga ishonishda davom etamiz. Muxlislarning holatini yaxshi tushunaman. Lekin hozir aql bilan ish qilish zarur. Ishqibozlarimiz jamoa va futbolchilarga ishonishlari lozim. "Real" "Barselona"ga qarshi juda yomon o'ynadi. Lekin bu futbolchilar o'z ishlariga noto'g'ri munosabatda degani emas. Muxlislarimizning talab istaklarini hurmat qilaman va tushunaman. "Real" muxlislari juda talabchan. O'yinga qanday tarkibni qo'yishni esa bosh murabbiy hal etadi. Bu klubda juda ko'plab murabbiylar ishlashgan va har doim tarkibda kimni tushirishni o'zlari hal etishgan", - deydi Florentino Peres.

Florentino Peres shuningdek bosh murabbiyni istefoga chiqarish mavzusi klubda ko'tarilmaganini ham aytib o'tdi.

"Klub kengashida hech bir inson bosh murabbiy masalasi borasida to'xtalmagan. Istefo haqida hech qanday gap-so'z bo'lgani yo'q. Biz Benitesga ishlashga imkon beramiz. Hech bir futbolchi, xususan Ronaldu ham Benitesni bo'shatish kerak deb aytmagan. Krishtianu meni yoki Benitesni tanlaysiz deb ham aytmagan. Ko'pchilik mensiz "Real"ga yanada yaxshi bo'ladi deb o'ylamoqda. Men bunga qo'shilmayman. Ronaldu sotish borasida ham men hech kim bilan gaplashganim yo'q. Bu yolg'on malumot. Benitesga ishonmasligimiz haqidagi xabarlar ham uydirma", - dedi Florentino Peres.