Baxtiyor Ashurmatov: "Lyasyuk bizda iliq taassurot qoldirmadi"

Futbolchilarga ikki kunlik dam olish elon qilingach, 20 iyuldan ikkinchi davraga tayyorgarlikning navbatdagi bosqichiga kirishiladi. Jizzaxning "So'g'diyona" klubiga qarshi nazorat o'yinidan so'ng dastlabki yig'in va bazi masalalarga oydinlik kiritish maqsadida jamoa bosh murabbiyi Baxtiyor Ashurmatovga murojaat qildik.

- Birinchi yig'in Sizda qanday taassurot qoldirdi?
- Bugun shogirdlarim "So'g'diyona" futbolchilari bilan navbatdagi nazorat uchrashuvini o'tkazishdi. Birinchi bo'limda ular yaxshi o'yin namoyish etishdi. Ammo, ikkinchi taymda raqibga ikki gol urishga imkon berishdi. Uchrashuvdan oldin ularga agarda g'alaba qozonishmasa, uylariga bir kun kechroq qaytishlarini aytgandim. SHu boisdan futbolchilarning uylarini sog'inishgani ularning o'yinlariga ham o'z tasirini o'tkazdi deb o'ylayman. Ertaga o'yinchilarga ikki kunlik xordiq elon qilinadi. SHundan so'ng navbatdagi yig'inimiz "Lokomotiv" bilan uchrashuvga qadar davom etadi.

- Tarkibga yangi qo'shilganlar xususida fikringiz qanday?
- Akbar Sattaev va Ruslan Kachurlarni bugun maydondagi harakatlarini kuzatdik. Navbatdagi yig'inlarimizda ularni ham taklif etishga qaror qildik. 20 iyuldan so'ng tashkil etiladigan yig'inimizda ham murabbiylar shtabi ishonchini oqlashsa, ular bilan ham shartnoma tuziladi.

- Abdumalik Abdullaev va SHahboz Erkinovlar nima sababdan uchrashuvlarda qatnashishmayapti?
- Abdullaev tibbiy ko'rik hulosasiga ko'ra davolanishi zarur. SHu sababli hujumchimiz ikkinchi davra boshlangunga qadar sog'ligini tiklamoqda. SHahboz Erkinov esa endigina jaroxatidan forig' bo'lib, individual dastur asosida mashg'ulotlarga kirishgan.

- Feruz Boboqulov va Mo'ydin Mamazulunovlar ham "Navbahor" safiga qo'shilishi mumkinligi to'g'risida mish-mishlar tarqarldi.
- Mamazulunovni jamoamizda ko'rmoqchi ekanligimiz rost gap. Ammo uning "Mashal" bilan o'zaro kelishuvi bor. Qolaversa muborakliklar rahbariyati ham futbolchini o'zida saqlab qolishga axd qilgan. Garchi Mo'ydin "Navbahor"ga o'tish istagini bildirgan bo'lsada, "Mashal" uni qo'yib yubormadi. Jahongir Mehmonov bilan ham shunga o'xshash vaziyat ro'y berganini takidlashim lozim. Feruz Boboqulov varianti esa muhokama qilinmagan.

- SHuningdek Andrey Lyasyuk ham katta moliyaviy talab qo'yganligi tufayli u bilan shartnoma tuzilmaganmish...
- Yo'q. Lyasyuk yomon o'yinchi emas. Lekin, u bizda iliq taassurot qoldirmagani bois bugun uni kuzatib yubordik. Futbolchi bilan iliq xayrlashib, bir birimizga omad tilaganmiz. Katta mablag'larni talab qiladigan o'yinchilar bilan shartnoma imzolamasligimizni oldin ham aytganman.