Baxtiyor Ashurmatov: "Legionerlarning harakatidan qoniqmadim"

Ushbu o'yindan so'ng "lochinlar" ustozi Baxtiyor Ashurmatovning fikrlari bilan qiziqdik.

"Obod" bizga yaxshigina dars o'tib berdi. Bu jamoa o'tgan yil birinchi ligada juda yaxshi ishtirok etgandi. O'yindan oldin yigitlarga oson bahs bo'lmasligini aytgandim. Afsuski barchaga bu gaplarim etib bormadi shekilli...

Bugungi o'yin biz uchun juda kerakli bo'ldi. Bir qator o'yinchilar haqida xulosa chiqarish uchun zarur edi. Tarkibda 8 nafar asosiy futbolchini kiritmadim. Ularni o'rnida yoshlar va yangi kelganlarni sinab ko'rdim. Jamoaga yordam bera olmaydigan o'yinchilarga javob beramiz. Tezroq biz jamoamiz o'zagini aniqlab olishimiz va mavsumga tayyorgarlikni davom ettirishimiz kerak", - deydi Baxtiyor Ashurmatov.

- Legionerlar borasida fikringiz?
- Ochig'i legionerlarning harakatidan qoniqmadim. Oliy liga boshlanishiga 1 oy vaqt qoldi, ularni tayyorlab 3-4 oy kuta olmaymiz. SHu bois bizga to'la tayyor bo'lgan legionerlar kerak.

- Jamoa bilan uzoq muddat birga bo'la olmaganingiz "Navbahor"ga tasir qilmadimi?
- Yo'q, bunday deb o'ylamayman. Sababi birinchi va ikkinchi yig'inda urg'uni ko'proq jismoniy tayyorgarlikka qaratilgan. Hozir esa asosan o'yinlar orqali mavsumga tayyorgarlik ko'rayapmiz. Bir oydan ortiq vaqt ichida jamoa o'yinini yaxshilab olishimizga ishonaman.


Humoyun Davurov suhbatlashdi