Baxtiyor Ashurmatov: "Jurnalistlar... Hech narsani esdan chiqarmaysizlar, qoyil!"

- O'yin haqida

- Juda muhim o'yin edi. Kerak bo'lsa 6 ochkolik o'yin, deb atasa ham bo'laveradi. "Metallurg" bilan musobaqa jadvalida qo'shni bo'lib turgandik. Aytish mumkinki, juda muhim ochkoni qo'lga kiritdik. Jasur Abduraimov kelgach  "Metallurg" hujumkorroq uslubda o'ynayotgan edi. SHu sabab raqibdan kelib chiqib, himoyaviy o'yin uslubini tanladik. "Andijon" bilan o'yindagi g'alaba ularga qo'shimcha kuch bergan, shu sabab juda ham og'ir o'yin bo'ldi.

- "Qo'qon-1912” bundan 19 yil avval Bekoboddan g'alaba bilan qaytgan ekan. Bugun nimaning evaziga g'alaba qo'lga kirildi deb o'ylaysiz?

- Buni bilmagan ekanman. "Metallurg" biz uchun noqulay jamoa. Uydagi o'yinda ham, kubokdagi o'yinda ham bu jamoaga mag'lub bo'lgandik. Yigitlarga buni takidlagandik. Bugungi o'yindagi g'alabaga sabab sifatida yigitlarning jangovor o'yin ko'rsatganliklarini keltirib o'tgan bo'lardim. Mezbonlar ham kamida durangga loyiq o'yin ko'rsatishdi.

- SHohnazar Norbekov o'zi ikkinchi bo'limda o'yinga qo'shilgandi. Keyin yana zaxiraga olindi...

- Bizda himoyadan ko'ra hujumda variantlar ko'proq edi. SHohnazar Norbekovga rahmat aytgan bo'lardim. Nega deganda himoyani kuchaytirish uchun zaxiraga olinishiga uning o'zi rozi bo'ldi. SHu sabab Farhod Bekmurodovni maydonga tushirdik.

- O'tgan o'yinda o'yinni cho'zish haqida fikr bildirgandingiz...

- Jurnalistlar... Hech narsani esdan chiqarmaysizlar, qoyil!  Ochig'i, bu narsa yodingizdan ko'tarildimi, deb o'ylagandim. O'tgan turda shu fikrni aytganim rost. Agar "Metallurg" jamoasiga va klub rahbariyatiga o'yinni cho'zgandek ko'ringan bo'lsak, bu uchun uzr so'rayman.