Baxtiyor Ashurmatov "Bunyodkor"ga qaytdi

Futbolchilik davrini bir necha etakchi jamoalarda o'tkazib, yorqin o'yinlari bilan muxlislar mehrini qozongan Baxtiyor Ashurmatov 2012 yilgi mavsumdan boshlab o'zini murabbiylikda sinab ko'rayotgan edi. Yosh mutaxassis "Guliston" jamoasini oliy ligaga olib chiqib, elitaning dastlabki turlarida ham ijobiy natijalar qayd etdi. Mavsum-2013 yakuniga ko'ra sirdaryoliklar oliy ligani tark etishgan bo'lsa-da, yosh iqtidorlar bilan ishlash borasida Baxtiyor Ashurmatov murabbiylik sohasida juda yaxshi taassurot qoldirdi.

Ayni paytda PRO licenziyasi uchun tahsil olyotgan Baxtiyor Ashurmatov murabbiylikdagi keyingi faoliyatini Toshkentning Bunyodkor jamoasi bilan bog'ladi. Yosh mutaxassis jamoamizning murabbiylar shtabida Mirjalol Qosimovga ko'maklashadi.

Aytish joizki, "Bunyodkor" jamoasi Baxtiyor Ashurmatov uchun begona klub emas. U 2007-2009 yillar mobaynida qaldirg'ochlar safida jami 62ta uchrashuvda maydonga tushgan va O'zbekiston chempioni, kubogi sohibi, shuningdek Osiyo CHempionlar ligasi yarim finalchisi degan sharafli nomlarga sazovor bo'lgan.

Baxtiyor Ashurmatovning "Bunyodkor"da murabbiy sifatidagi faoliyati ham muvaffaqiyatlarga boy bo'lishini tilab qolamiz.