Baxtiyor Ashurmatov: "Afsuski bugun VAR ishlatilmadi..."

"Bugungi g'alabada muxlislarning ham hissasi bor. Aytaylik hisobda ortda borsak muxlislarimiz hujumga o'tishimizni talab qilishadi, bu esa yigitlarga qo'shimcha kuch beradi. "Lokomotiv" biz uchun murakkab raqib ekanligini bilardik, ular mavsum boshida medallar uchun kurashishni maqsad qilgandi, lekin xorijlik murabbiy o'z uslubini yo'lga qo'yib olishda qiynaldi. So'nggi paytlarda esa "Lokomotiv" yaxshi o'yin namoyish etayotgandi.

Bugun to'p nazorati va pozicion hujum qilishda raqib ustunlik qildi, ammo oxirigacha kurashish va ishtiyoq borasida biz g'alaba qozondik. Bundan juda xursandman. Gapni ochig'i biz hozirgi o'rnimizga munosib emasmiz. Zaxiradan tushganlar o'yinimizni kuchaytira olishdi va muhim g'alabani qo'lga kiritdik", - deydi Baxtiyor Ashurmatov.

- Raqib ustozi mag'lubiyatni hakamlar tufayli bo'ldi deb aytdi...
- Hakamlar ikkala tomonga ham xato qilishdi, qaysidir jamoaga yon bosdi deb ayta olmayman. Afsuski bugun VAR ishlatilmadi. G'alabadan keyin hakamlik haqida gapirishim noto'g'ri bo'lsa kerak. Yakuba Bambadan gol urilgan vaqtda to'p qo'linga tegdimi deb so'radim, u to'p yuziga tegib darvozaga kirdi dedi.

- Jamoa harakat qilsa mavsumni 8-o'rinni saqlab qolishi mumkin...
- Yo'q, maqsadimiz 8-o'rinni saqlab qolish emas, oldinda yana o'yinlar bor va imkon qadar ko'proq ochko olish va yuqoriroq o'rinni olishga harakat qilamiz. To'g'ri birinchi davrada o'z maydonimizdagi o'yinlarda ko'p ochko yo'qotdik. Ularning o'rnini to'ldirishimiz kerak. Buni niyat qilib qolaman.

- Murod Xolmuhammedovning jarohati jiddiy emasmi?
- Bu yil ko'plab jarohatlar kuzatildi. Xolmuhammedov, Akbarovda jarohat bor edi. Bugun Oybek Rustamov kichik jarohat bilan o'ynadi. Afsuski Murodning jarohati jiddiyroq edi, shu bois uni almashtirdim. Oldimizda kichik tanaffus bor, shu vaqtda ular tezroq safga qaytishlarini so'rab qolamiz.

Video. Mikael Sekeyradan achchiq gaplar: "SHu tizim bo'lsa, O'zbekiston hech qachon Jahon chempionatiga chiqa olmaydi"