Bahrom Haydarov: "4 ta turdan buyon davom etayotgan g'alabasiz seriya bosimidan o'tib oldik"

O'yin haqida

- Birinchi g'alaba bilan jamoamiz muxlislari va klubimiz rahbariyatini tabriklayman. Ancha yoqimli hissiyot, g'alabalarimiz bardavom bo'lsin. Birinchi bo'limni yaxshi o'tkazdik. Mashg'ulotlardagi tayyorgarlik ishlanmalarimiz ishladi. 4 ta turdan beri davom etayotgan g'alabasiz seriya bosimidan o'tib oldik. Ikkinchi bo'limda ozroq xotirjamlikka berildik. Jarohatlar rejalarga tasir ko'rsatdi. Xatolarni ko'rib chiqib, xulosa chiqaramiz.

- Keyingi o'yinlar haqida fikringiz? O'zbekiston kubogidagi maqsadlar qanday?

- Bizda chempionat yoki kubok uchrashuvi ajratilmaydi. Har ikki turnir biz uchun muhim. Raqibga qarab yoshlarga ham imkoniyat beramiz. Kubokdagi birinchi vazifamiz bu - guruhdan chiqish.

- Qizil kartochka olgan futbolchilar nechta turga chetlatilgani haqida oydinlik kiritildimi?

- Biz ham kutayapmiz. G'ofurov ham, Hasanov ham asosiy tarkibda raqobat yarata oladigan futbolchilar. Keyingi turdan ko'rib chiqilsa kerak. Rejalarni shunga qarab tuzamiz.

- O'rinbosarlar tarkibida Jasur Ahmadjonov 7 ta gol urdi. Uni asosiy tarkibga jalb etish rejasi bormi?

- Albatta, biz uni kuzatib borayapmiz. Bugungi o'yin qaydnomasiga ham kiritmoqchi edik. Jasur asosiy tarkib bilan mashg'ulotlarni ham olib bordi. Yoshlar tarkibimizdan futbolchilar etishib chiqsa, bundan faqat xursand bo'lamiz.