Bahodir Nasimovning goli Eron peshqadamini mag'lub etdi

Ushbu o'yinlar orasida eng kutilmagan natija Eron chempionati peshqadami Tabrizning Traktorisozi klubining o'z maydonida Padideh klubiga mag'lub bo'lgani bo'ldi. SHu kuni o'zbekistonlik Bahodir Nasimov uchrashuv qahramoniga aylandi.

Tabrizdagi muhtasham o'yingohda kechgan bahsning 45-daqiqasida mezbonlar vakili Ahmadzoda hisobni ochib, Traktorsozini bo'limni g'alaba bilan yakunlashiga sababchi bo'ldi, 1:0.

Bunday natija mehmonlarni qoniqtirmasligi aniq edi va ikkinchi bo'lim boshida Padideh murabbiylari Bahodir Nasimovni maydonga tushirishdi. Aynan Bahodirning o'yinga qo'shilishi yakunda samara berdi. Xususan, o'yinning 80-daqiqasida Bahodir Nasimovni jarima maydonida Traktorsozi himoyachilari qo'pollik bilan to'xtatib qolishgani uchun bosh hakam penalti belgiladi va uning jamoadoshi xorvatiyalik Igor Praxich muvozanatni tikladi, 1:1. Ushbu gol asosiy vaqtda g'olibni aniqlamadi va jamoalar qo'shimcha taymlarni boshlashdi.

Qo'shimcha taymlarni hujumkorlik bilan boshlagan mehmonlar, 93-daqiqada Bahodir Nasimovning jarima maydoni tashqarisidan yo'llagan kuchli zarbasi bilan g'alaba golini kiritishdi, 1:2. Bu uning Erondagi debyut goli edi.

SHiddatli kurashlarga boy o'tgan bahsda, ko'pchilik uchun kutilmaganda chempionat peshqadami, kubok uchun bosh davogar Traktorsozi klubi samarqandlik hujumchining goli evaziga turnirni tark etishga majbur bo'ldi. Padiheh klubi esa o'z tarixida birinchi marotaba mamlakat kubogi yarimfinaliga yo'l oldi.

27 noyabr (payshanba)
Eron Kubogi. CHorakfinal.
Traktorsozi (Tabriz) – Padideh (Mashhad) – 1:2 (1:0, 1:1, 1:2)
Gollar: Ahmadzoda 45 – Praxich (80, pen), Bahodir Nasimov 93.