Bahodir Mirzaev: "Quradan ko'nglimiz to'ldi, buyog'iga amalda ko'rsatish qoldi"

Klub bosh direktori Bahodir Mirzaev taqvim, raqiblar yuzasidan quyidagi fikrlarini bildirdi. 

"Qura jarayonini kuzatdim. Yaxshi qura bo'ldi. Avvaldan aytib kelganman, mavsumni o'z maydonimizda boshlash yaxshi. O'z muxlislarimiz ko'z o'ngida Olmaliq ahliga g'alaba tortiq qilish uchun harakat qilamiz. Ilk turlarda qo'lga kiritiladigan g'alaba butun mavsumga qo'shimcha kuch beradi. Ikkinchi turni ham uyda o'tkazishimiz yanada yaxshi deb o'ylayman. Umuman birinchi davra taqvimidan ko'nglimiz to'ldi. Buyog'iga amalda ko'rsatish qoldi.

Dastlabki 5 ta turda barcha jamoalarning imkoniyatlari teng bo'ladi. Boisi hozirgi kunda jamoalar mavsumga tayyorgarlik ko'rmoqda. Kuniga ikki mahaldan yuklamalar olishmoqda. Ketma-ket nazorat uchrashuvlari o'tkazishmoqda. Bu bir yillik mavsum uchun poydevor vazifasini o'taydi. Dastlabki turlarda bir-birini tushunib olishi uchun vaqt kerak. OKMKning o'zagini saqlab qolganimiz bizning asosiy yutug'imiz bo'lishi kerak.

OKMK o'z oldiga chempionlik va kubok g'olibligini maqsad qilib qo'ygan. Bu orqali OCHLga yo'llanma olishimiz kerak. OKMK muxlislarini xursand qilishi uchun borini beradi", - deydi Bahodir Mirzaev.