Bahodir Ahmedov: "Terma jamoaga munosib nomzodlar saralanmoqda"

Biz shu fursatdan foydalanib, futzal bo'yicha O'zbekiston milliy terma jamoasi bosh murabbiyi Bahodir Ahmedov bilan suhbatlashdik.

- Bahodir aka, terma jamoamiz bosh murabbiyi sifatida bo'lib o'tayotgan milliy chempionat borasida qanday fikrdasiz?
- Avvalo barcha uchrashuvlarni kuzatib borayotganimni va bu orqali terma jamoaga eng munosiblar saralab olinayotganini aytib o'tishim kerak. Yildan yilga futzal bo'yicha O'zbekiston chempionati kuchayib bormoqda. Futzal ixlosmandlari va uchrashuvlarni tomosha qilayotgan tomoshabinlar buning guvohi bo'lmoqda. Yoshlarning ko'pligi meni xursand qilyapti va shularga ko'proq etibor beryapmiz. CHempionatning kuchayishi terma jamoaga katta madad bo'ladi. Bu borada yana shuni qo'shimcha qilib o'tishim kerak, bundan uch-to'rt yil oldin faqat "Ardus" va "Stroitel-Zarafshon" jamoalarini bilardik. Endi bo'lsa, bir nechta teng kuchli raqiblar bor. Hech bir o'yinda favoritni aniq ayta olmaslik ham raqobat kuchli ekanligidandir.

- Jamoalar o'rtasidagi raqobat o'z samarasini beryaptimi?
- Albatta, natijasini ko'ryapmiz. Mana yaqinda Osiyo chempionatiga saralash bahslarida ham ijobiy natijani qo'lga kiritdik. Hozirda barcha klublarni mahalliy murabbiylar boshqarmoqda va bu ham qaysidir manoda chempionatda murabbiylar saviyasi oshishiga olib keladi. Ispaniyadan kelgan murabbiylar ham futzal rivojida o'z hissalarini qo'shib ketdi. Ulardan mahalliy murabbiylarimiz va futzalchilarimiz ko'p narsani o'rgandi.

- Terma jamoa haqida ham to'xtalib o'tsangiz?
- Hozir mana shu bosqich orqali tayyorgarlik olib boryapmiz. Fevral oyidan boshlab xorijda yig'in tashkil etishni rejalashtirganmiz. Hozirda asosan yoshlarga etabor qaratyapmiz va shu orqali Osiyo chempionatiga tayyorlanib bormoqchimiz.

- Terma jamoamiz Osiyo chempionati saralash bosqichidan muvaffaqiyatli o'tdi, lekin shunga qaramay Eron klubiga yirik mag'lubiyatga uchradi. Bu borada fikringiz qanday?
- Biz bunga jiddiy etabor qaratganimiz yo'q. Terma jamoaga nomzod yoshlarni sinovdan o'tkazib oldik. Natijadan bo'lmasa ham ko'rsatgan o'yindan xursand bo'ldim. Biz ularni katta bahslarga moslashtirib bormasak bo'lmaydi.

- Terma jamoa oldida qanday rejalar bor?
- Fevralda Ozarboyjonda o'quv-mashg'ulot yig'inini tashkil etmoqchimiz. Undan tashqari, Toshkentga Evropaning kuchli jamoalarini o'rtoqlik uchrashuvi o'tkazish uchun taklif etmoqchimiz. Ikkinchi yig'in esa Portugaliyada tashkillashtiriladi.

- Osiyo chempionatida terma jamoa oldiga qanday maqsad qo'yiladi?
- Biz sovrindor bo'lib qaytmoqchimiz.

Humoyun Davurov suhbatlashdi.