Bahodir Ahmedov: "Bugungi avlodimiz bilan kelajakka umid va ishonch bilan qarashimiz mumkin"

Mundial davomida muxlislar mehrini qozona olgan vakillarimiz garchi nimchorak finaldan so'ng ortga qaytishgan bo'lsada, ular ko'rsatgan o'yin barchamizda iliq taassurot qoldirdi. Futzalchilarni o'yinlarga tayyorlashda murabbiylar shtabining xizmati katta bo'ldi, desak mubolag'a bo'lmaydi. 2016 yil Kolumbiyadagi Jahon chempionatida yordamchi murabbiy sifatida qatnashgan Bahodir Ahmedov Litvadagi musobaqada bosh murabbiy sifatida shogirdlarini boshlab tushdi. Bu haqida murabbiyning fikrlari quyidagicha bo'ldi.

"Yordamchi sifatida menga osonroq bo'lgandi, deya olaman. Bunda siz bosh murabbiy bilan maslahatlashgan holda ish qilasiz. Bosh murabbiy rolida terma jamoada ishlash katta masuliyat va o'ziga yarasha qiyin. Buni Litvadagi Jahon chempionatida ham bildim. Ochig'i so'z bilan tariflash qiyin. Ayni paytda hissiyotlar ajoyib. SHunday bo'lsada muxlislardan so'nggi o'yindagi mag'lubiyat uchun uzur so'rayman. O'zimizning xatolarimiz evaziga imkoniyatni boy berdik. Bizning terma jamoa xalqaro turnirlarda o'ynay olishini ko'rsatdi. 

Bugungi avlodimiz bilan kelajakka umid va ishonch bilan qarashimiz mumkin. Juda yaxshi yosh futzalchilar etishib chiqmoqda. Keyingi yig'inlarda ularni ham jalb qilamiz",- deydi Bahodir Ahmedov.

Abdulaziz Iskandarov yozib oldi