BAA kundaligi: Sharjada "yo'qotilgan" vaqt

Kecha, 1 iyun kuni Championat.asia vakillari – Nodirxo'ja Yuldashev, Jahongir Fayzullaev, Samandar Shokirov, Abdulvosit Bektemirov va kamina Sherzod Nurmatov yaxshi niyat bilan BAA safariga otlandik.

Air Arabia aviakompaniyasining Airbus A320 samolyoti taxminan 14:10 da uchib, mahalliy vaqt bilan 16:35 da MTJ etakchilaridan biri Otabek Shukurov 5 yil yashagan zamin – Sharja shahriga kelib qo'ndi.

Havo layneri qo'ngach, perron avtobuslari (yo'lovchilarni terminaldan samolyotgacha yoki samolyotdan terminalgacha tashiydigan avtobus – tahr.) bizni terminalga eltib qo'ydi. U erda ikki kishini "syurpriz" kutayotganini biz hali bilmasdik. Toshkent – Sharja yo'nalishida kelganlar birin-ketin pasport nazoratidan avtomatik ravishda o'tib ketish uchun mo'ljallangan uskuna – smart gate orqali o'tib keta boshladi. Men va operator Samandar Shokirov ilk bor BAAga kelganimiz bois pasportimiz tizimda xatolik ko'rsatdi va biz "to'siq"dan o'tib keta olmadik. Gap shundaki, tushunarsiz sababga ko'ra BAAga ilk bor kelganlar smart gate'dan o'ta olishmayapti. 

Aeroport xodimlaridan yordam so'raganimizda, ular bizni pasport nazorati bilan shug'ullanuvchi xodim tomon yuborishdi. U biz va taxminan yana 10-15 nafar o'zbekistonliklarga so'rovnoma (anketa) to'ldirishni buyurdi. So'rovnoma to'ldirganimizdan so'ng u pasport va anketalarni olib, diplomatiya xodimlari o'tiradigan xonaga olib ketdi. Shundan so'ng u erda uzoq muhokama davom etdi va hujjatlarimiz shu bilan ichkarida qoldi. "Bizning ishlarimiz nima bo'ldi?" deya ko'p bor so'raganimizda qaramay, aniq bir javob berishmadi. Bir xodimning ish vaqti tugab, ikkinchisi kelganida, nihoyat, bizning ishimiz bitadigan bo'ldi. 5 soatdan uzoq vaqt davom etgan kutishdan keyin pasportlarimizni bizga torshirishdi. Unga arabcha yozuvdagi maxsus stiker yopishtirib qo'yilgandi, uni hatto maxsus tarjimon dasturlarida ham o'gira olmadik. Pasport nazorati xodimi uni o'qidi va kameraga qarashni buyurdi. Xayriyatki, hammasi ijobiy hal bo'ldi va biz Sharja aeroportidan ochiq havoda nafas olishni boshladik. To'g'ri, havo ancha nam, lekin ichkarida sababsiz va soatlab kutishdan ancha durust, men sizga aytsam. 

Darhaqiqat, arab diplomatlaridan biri bilan suhbatlashganimizda u Otabek Shukurov va Aziz G'anievni yaxshi tanishini bildirib, ular haqida iliq fikrlarni aytdi. Keyin esa BAA – O'zbekiston uchrashuvida qanday hisob qayd etilishini so'radi. Men diplomatik javob qaytarib, 1:1 deb qo'ya qoldim. Aslida esa termamizga ishonaman va biz hisobdan qati nazar albatta g'alaba qozonamiz. Shunchaki ichimda o'ylab turgan hisobni aytganimda, aeroportda yana nimadir voqeliklar boshlanib ketishidan cho'chidim.

Ha, shunday qilib, biz bir amallab aeroportdan chiqdik va Sharjadan Dubayga yo'l oldik. Taksiga minib, taxminan 50 daqiqada o'z mehmonxonamizga etib keldik. 

Endi MTJ mashg'ulotlarni yopiq holda o'tkazayotgani munosabati bilan o'yin bo'lib o'tadigan stadion va uning atrofidagi vaziyatni o'rganamiz. 

Sherzod Nurmatov

Dubay, BAA