BAA kundaligi: CA korteji yoxud Abu-Dabini egallagan OAV

Mehmonxonaga kirib borishimiz ham qiziq kechdi. Security (qo'riqlash xodimi) baraka topsin, bizga ortiqa to'sqinlik qilmadi va yo'limizni ochib berdi. Shu tariqa voqea joyidan stendap, foto va video tayyorlashga muvaffaq bo'ldik. Bizni u erda ko'rgan futbolchilar ham biroz ajablandi, chunki terma lageri yopiq holatda bo'lgani uchun ular biz topib borishimizni kutmagan. 

Terma jamoa 12:30 da mehmonxonani tark etgan bo'lsa, biz yo'l-yo'lakay mashinamiz benzinini to'ldirib oldik va avtobus bilan kortej hosil qilib ketdik. 

Shunday qilib, mahalliy vaqt bilan soat 13:50 da terma jamoa o'zi uchun ajratilgan oteliga etib keldi va tushlik qilishga kirib ketdi. 

Biz Abu-Dabidagi "Al Nahayyon" stadioniga yo'l oldik va matbuot anjumaniga qadar fotoreportaj tayyorladik. Keyin soat 18:00 da BAA terma jamoasi bosh murabbiyi Kosmin Olariu va Holid Eysa ishtirokida matbuot anjumani tashkil etildi. BAA ustozi sifatidagi birinchi matbuot anjumanida qatnashgan Olariu: "Bunday qisqa vaqt ichida katta o'zgarishlar qilish qiyin. So'nggi bir hafta davomida biz tayyorgarlik olib bordik. Futbolchilarda ishtiyoq juda yuqori, ayrim vaziyatlarda men ularga tinchlanish kerakligi haqida ham aytdim", dedi. Matbuot anjumanidan so'ng mezbonlar OAV vakillari uchun 15 daqiqa ochiq o'tadigan mashg'ulotlarga kirishdi. Biz jarayonlarni tarixga muhrladik. 

Shundan so'ng 19:15 da Timur Kapadze va Jaloliddin Masharipov ishtirokida anjuman rejalashtirilgandi. Biroq ular 15 daqiqa kechikib kelishdi. Ehtimol, bu terma jamoa joylashgan mehmonxona stadiondan 25 km uzoqlikda bo'lgani uchundir. Ayniqsa, tig'iz vaqtda stadionga o'z vaqtida etib kelish mushkul. Bu narsa ertangi o'yinda ham tasirini o'tkazmasa bas. 

Shu joyida yana matbuot anjumani mavzusiga qaytadigan bo'lsak, unda qatnashganlarning 90 foizi o'zbekistonliklar edi. Bu chamasi 40 nafar jurnalist deganidir. Bu raqam shunchaki hayratlanarli! Ular orasida ko'pni ko'rgan jurnalist va sharhlovchilar bilan bir qatorda, endi o'sib kelayotgan OAV vakillarini ham ko'rishimiz mumkin edi. Tajribali jurnalistlarning malum qilishicha, bu kabi holat ilgari O'zbekistonda yaponiyalik jurnalistlar ishtirokida ro'y bergan ekan. Timur Kapadze hamda Jaloliddin Masharipov ham bundan biroz taajjubga tushgani va hayajonlangani sezildi. Nima ham deymiz, Abu-Dabida fayzimizni bersin. Masharipov takidlaganidek, hech qachon bunday bosqich va davrda bo'lmaganmiz. Butun xalq terma jamoadan ijobiy natijani kutmoqda. 

Matbuot anjumanidan avval o'zbekistonlik jurnalistlarning akkreditaciyasi masalasi ham ochiq turgandi, yani so'roq ostida edi. Biroq O'FAning say-harakatlari evaziga bu ijobiy hal etildi va O'zbekistondan kelgan hamkasblar stadionga kirishda ortiqcha muammoga duch kelmasligi aniq bo'lib ulgurdi.

Xullas, bugungi kunimiz barakali o'tdi. Odam yoqimli charchoqni his etdi desak mubolag'a bo'lmaydi. Endi Sardor Rashidov avjiga chiqqan "90minutuz" podkastini tomosha qilib, hordiq chiqaramiz. Shuningdek, ertangi tarixiy kun uchun kuch to'playmiz.

Sherzod Nurmatov

Dubay, BAA

BAA kundaligi: Sharjada "yo'qotilgan" vaqt