Azamat Abduraimov: "Rahbariyat va muxlislar ishonchini oqlaganimizdan xursandmiz"

Birinchilik bahslarining 13-turida andijonliklar “SHerdor” jamoasini qabul qilib 5:1 hisobida g'alaba qozonishdi. Ushbu g'alaba Azamat Abduraimov shogirdlariga oliy liga yo'llanmasini taqdim qildi. “Andijon” oliy liga masalasini hal qilgach, jamoa ustozi o'z fikrlarini bildirdi.

"Avvalo shuni aytishim kerakki, klub mutasaddilari va muxlislari yil boshida bizga ishonch bildirishgandi. Mana shu ishonchni oqlaganimizdan juda xursandmiz. Bugun “SHerdor” jamoasi ustidan zafar quchib oliy liga yo'llanmasini muddatidan oldin hal etdik. Albatta, bu yil davomida qilgan mehnatlarimiz samarasi bo'ldi. Qizig'i, 2013 yilning 13 oktyabri va 13-tur uchrashuvida oldimizga qo'yilgan vazifani bajardik. “SHerdor”ga qarshi bahsda shogirdlarim juda yaxshi o'yin ko'rsatib, vazifani bajarish uchun astoydil harakat qilishdi. Ishqibozlar bugun bir-biridan chiroyli gollarga guvoh bo'ldilar. Asosiysi, bugun masalani muddatidan oldin hal etib muxlislarimizga oliy liga yo'llanmasini tuhfa etdik", - deydi Azamat Abduraimov.