Asror G'ofurov: "Navoiylik muxlislardan ozgina sabr qilishlarini so'rab qolaman"

- Avvalo legionerlik faoliyatigiz haqida qisqacha to'xtalib o'tsangiz. CHempionlik hissiyotlari qanday bo'ldi?

- Albatta, so'nggi 3 yilni Bangladesh chempionatida o'tkazdim va chempionlikni qo'lga kiritdim. Qolaversa, jamoamiz kubokni ham yutdi. Qaysi mamlakatda bo'lmasin, chempionlik juda ham yoqimli bo'lar ekan. Bayrog'imizni o'zga davlatlarda yuqorilarga ko'tarish bu har bir sportchining orzusi bo'lsa kerak. 

- Asror G'ofurovning legionerlik faoliyati cho'qqiga chiqayotgan bir pallada uning O'zbekiston Superligasida, ustiga-ustak jon saqlash uchun harakat qilayotgan jamoada paydo bo'lishi qanday ro'y berdi va nimalar sabab bo'ldi?

- Bilasizmi, birinchi navbatda menga ona vatan sog'inchi sabab bo'ldi. Qolaversa, legioner sifatida yuqori natijaga erishib qaytish menimcha yaxshi bo'lsa kerak. Keyin 3 yil mobaynida Bangladeshda bo'ldim. Undan tashqari 6 yil Turkiyada to'p tepdim. Bu kam vaqt emas menimcha, undan tashqari oiladan shuncha vaqt chetda bo'lish qiyin.

-  “Qizilqum”dan tashqari takliflar bo'lmadimi?

- Takliflar bor edi. Asosan Indoneziya, Tailand va Bangladeshning o'zidan ham yaxshi chorlovlar bo'ldi. Lekin yuqorida aytganimdek yurt sog'inchi meni vatanimga qaytardi.

- Asror yana milliy chempionatimizga qaytdingiz va bir necha uchrashuvlarda maydonga tushdingiz. Oldingi va hozirgi paytlarni solishtirsak, Superligada nimalarni o'zgarganini ko'rdingiz yoki nimalar hali hamon o'zgarishsizsiz qolgan?

- Oxirgi yillarda bizning chempionatimizda o'zgarishlar juda ham ko'p. Masalan oldinlari maydonlar qanaqa ahvolda edi, hozir qanday darajada. VAR tizimi futbolimizga kirib kelishi, maydonlarning projektorlari va har bir o'yindan jonli translyaciyalar barchasi futbolimizning anchagina oldinga yurish qilganidan dalolat beradi. 

- Asror G'ofurovni yangi mavsumda yana legioner sifatida ko'ramizmi?

- Bilasizmi men Superligaga qaytishimning asosiy maqsadi unchalik kuchli bo'lmagan chempionatda to'p tepib, o'z formamni sal bo'lsada pastga tushirdim. SHu sababdan ham men O'zbekistonda o'zimni yana qayta kashf qilmoqchiman. SHuning uchun hali boshqa davlatga ketishni reja qilganim yo'q. 

- Asror G'ofurovning navoiylik futbol muxlislariga aytadigan gaplari bormi?

- Bizning sodiq muxlislarga ozgina sabr qilishlarini va biz ularga ko'plab g'alabali onlarni taqdim qilishimizni aytib o'tgan bo'lardim. Albatta ular uchun sevimli bo'lgan jamoasini Superligada, mavsum yakunida yaxshi o'rinlarda ko'rishlari uchun tinmasdan harakat qilayotganimizni takidlagan bo'lardim.

SHoxruh Meylixolov suhbatlashdi