Асрор Ғофуров: “Янги жамоам ОЧЛда иштирок этади”

Футболчи ушбу клуб билан шартнома имзолади. Шундан кейин Ғофуров билан боғланиб, янги жамоага ўтиши юзасида фикрларига қулоқ тутдик. 

- Асрор, “Башундхарага” ўтишингиз қай тариқа амалга ошди?

- Мен бундан аввал “Саиф” клубида ўйнагандим. Чемпионат якунига етишига оз вақт қолганда, агентим “Башундхара”дан таклиф бўлаётганини айтиб қолди. Натижада, биз клуб томонидан берилган барча шароитларни кўриб чиқдик. Ҳаммаси мени тўлақонли қониқтирди ва келишувга эришдик. Биласиз, “Башундхара” янги мавсумда Осиё Чемпионлар лигасида иштирок этади. Шу жиҳатлари мени янада ўзига жалб қилди. 

- Жамоа билан қанча муддатли шартнома имзоладингиз?

- Келишув бир йилга мўлжалланган. 

- Аввалги клубингиз сизни олиб қолишга ҳаракат қилмадими?

- Биласизми, “Саиф Спортинг” янги мавсумда Бангладеш Премьер-лигасида ўйнамайди. Клуб раҳбари федерациядан шундай қарорни олган ва улар чемпионатдан чиқиб кетди. 

- Чемпионат даражаси борасида қандай фикрдасиз?

- Ҳаммаси яхши. Йилдан-йилга чемпионат ўйинлари қизиқарли бўлмоқда. Ривожланишда давом этмоқда. Бу йилдан чемпионатда легионерлар сони оширилди. Илгари 4 та футболчи ўйнаган бўлса, ҳозирда лимит 5 тага етказилди. Стадионлари яхши ҳолатга келтирмоқда. Тўғри, бу ерда крикет асосий спорт тури ҳисобланади. Шунга қарамай, футболга ҳам босқичма-босқич эътибор берилган. Клублар яхши легионерлар хизматига таянмоқда. 

- Бу ерда ўзбекистонлик футболчилар сони ошмоқда. Бунга асосий сабаб нимада?

- Бизда футбол анча юқори. Элдор Шомуродов ва Жалол Машарипов сингари футболчилар чет клубларида ўйнаб, футболимиз номини янада танитмоқда. Терма жамоамиз ҳам яхши натижалар қайд этмоқда. Қолаверса, Бангладешга келаётган футболчилар ҳам яхши ўйнамоқда. Ўзларини кўрсатмоқда. Табиийки, клубларда ўзбекистонлик чарм тўп усталарига ьўлган қизиқиши ортмоқда.