Artur Yunusov: "Tay Son Nam" oldiga OCHLda yutish vazifasi qo'yilgan"

Bu haqda avvalroq xabar bergan edik. Arturning ana shu turnir haqidagi fikrlari bilan qiziqdik.

"Bu har yili odatiy tarzda o'tkazib kelinadigan turnir. Uni Vetnam futzal associaciyasi prezidenti tashkillashtiradi, juda yaxshi saviyadagi turnir deyish mumkin.

Turnirda 8 jamoa 2 guruhga bo'lingan holda bellashdi, ishtirokchilarning barchasi Vetnam oliy ligasi klublari.
Turnir juda yaxshi o'tdi, bu bizning jamoa uchun klublar o'rtasidagi Osiyo chempionlar ligasiga yaxshi tayyorgarlik bo'ldi desam ham bo'ladi. Hozir o'yin amaliyoti juda muhim.

Finalda birinchi golni urdim, finalda to'p kiritish nasib qilganidan xursandman. O'yin qiyin kechdi, guruh bosqichida shu jamoaga 2:5 hisobida mag'lub bo'lgan edik.

"Tay Son Nam" klubi oldiga Osiyo chempionlar ligasida g'alaba qozonish vazifa qilib qo'yilgan, menimcha ushbu musobaqaga keladigan har bir jamoa faqat bitta maqsad bilan ishtirok etadi".

Tolibjon Qosimov yozib oldi