Arpa ekib, bug'doy kutmaylik (2-qism)

O'zbekiston milliy terma jamoasi sardori Server Jeparovga quyidagi savollarga javob berdi:

1. Terma jamoamizning Osiyo chempionatidagi muvaffaqiyatsiz ishtirokini qanday qabul qildingiz?
2. Osiyo chempionatiga qadar ko'pchilik bu jamoamizdan kamida yarim finalga chiqishini kutgandi. Ammo yakunda guruhdan chiqa olmadik. SHaxsan siz futbolchilarimizdan qanday natija kutgandingiz?
3. Tayyorgarlikka etibor qaratilmadi. Balki, muvaffaqiyatsizlikning bosh sababchisi shu omil bo'lgandir?
4. O'FF Terma jamoalar markazi terma jamoaga bosh murabbiy tanlashda xatolikka yo'l qo'ydi. Bu fikrga qo'shilasizmi?
5. Bu omadsizlikdan so'ng nimalarni o'zgartirish kerak?
6. Bosh murabbiy futbolchilarimiz Osiyo chempionatidan katta tajriba to'plashdi, degan fikrni bildiryapti. Lekin terma jamoa tarkibidagi aksariyat futbolchilar yaqindagina jahon chempionatida ishtirok etib qaytishgandi. Sizningcha, mundial saviyasi Osiyo chempionatidan balandmi?


Server Jeparovning javoblari:

1. Albatta, Osiyo chempionatida qayd etilgan bu natija futbolimiz uchun juda ayanchli. Eshitishimcha, musobaqaga ko'ngildagidek tayyorgarlik bo'lmagan. SHu o'rinda milliy terma jamoamizning 2011 yili Osiyo Kubogiga ko'rgan tayyorgarligini misol tariqasida ko'rsatishni xohlardim. Tayyorgarlikka monand natija ham bo'lgandi.  

2. Hozir kimnidir ayblash juda qiyin. Osiyo chempionatidagi ishtirokimizni tahlil qilib chiqilganidan so'ng bu savolga javob olish mumkin. Jamoa guruhdan ham chiqa olmagan ekan, demak, bunga butun jamoa birdek aybdor. Futbolchilardan tortib, murabbiylar va delegaciya rahbarlarigacha aybni o'z zimmalariga olishlari kerak. CHunki, futbol jamoaviy sport turi hisoblanadi. Rahbariyat tayyorgarlik uchun etarli sharoitlarni yaratib bermagan. Murabbiylar imkoniyatdan boricha foydalanishgan. Futbolchilar esa bir-birlarini tushunib harakat qilishmagan. Boisi, tarkib asosan 1991 va 1993 yillarda tavallud topgan o'yinchilardan tashkil topgandi. Ularning bir jamoa bo'lib o'ynashi uchun esa o'rtoqlik uchrashuvlari kerak edi.   

3. Bu fikrga to'liq qo'shilaman. Terma jamoamiz xalqaro turnirga emas, Osiyo chempionatining final bosqichida ishtirok etish uchun ketayotgandi. Tayyorgarlik esa shunga munosib bo'lmadi. Futbolchilarning bir-birini tushunib harakat qilishi uchun kuchli raqiblar bilan bir nechta o'yinlar tashkil etish kerak edi. Murabbiylar shu uchrashuvlarda turli taktik sxemalarni amalda qo'llab olishardi. Bu narsalarning birortasi bo'lmaganidan keyin, qanday qilib jamoamizdan ijobiy natija kutish mumkin?

4. Har qanday murabbiyga ham ishlash va tayyorgarlik ko'rish uchun vaqt kerak. SHuhrat Maqsudovda bunday imkoniyat bo'lmadi. O'zi o'ylagan rejalarini amaliyotga tadbiq etgunicha, musobaqa tugab qoldi. Agar barcha terma jamoalarimiz bir hil o'yin uslubida o'ynashganida, bu murabbiyimizga ham qiyin bo'lmasdi.
 
5. Bu savolga javob berishga qiynalaman. Lekin nimadir qilish kerak.

6. Yoshlarimiz Turkiyadagi jahon chempionatida ishtirok etib, yaxshigina tajriba to'plashdi. Ammo bitta musobaqa bilan mahorat oshib qolmaydi. Tajribani oshirish uchun yillar kerak bo'ladi. Agar kuchli chempionatga ega bo'lib, yiliga kamida 30ta o'yin o'tkazganimizda, natijamiz bunday salbiy ko'rinishda bo'lmasmidi? 

Javoblarni o'qidingiz. Deyarli bir hilda savolarga javob berishdi. Hali bu mavzu juda ko'p muhokama qilinadi. Biz ko'proq bu muhokamani O'FF hamda Terma jamoalar markazi mutasaddilari qilishlarini istardik. CHunki, biz tahlil qilganimizdan foyda yo'q.
 
Kamoliddin ALIMOV