APL. "Arsenal"ni "arilar" taladi, "qizil iblislar" esa "yo'lbarslar"ni enga olmadi. 23-tur sharhi

Ayni paytda ligada jon saqlab qolish uchun kurashayotgan "Suonsi" o'z maydonida tempni ushlay olmayotgan "Sautgempton"ni qabul qildi. Gulfi Sigurdssonning goli va golli pasi mezbonlarga g'alaba keltirdi. Ushbu bahsda "oqqushlar"ning yangi xaridi Lusiano Narsingx ham bitta golli pasni amalga oshirdi. "Sautgempton" tarkibida esa yagona golga SHeyn Long mualliflik qildi.

Turnir jadvalida so'nggi pog'onada borayotgan "Sanderlend" kutilmaganda o'z maydonida "Tottenxem"dan ochko tortib oldi. Uchrashuvda hisob ochilmadi.

"Midlsbro" bu tur "Vest Bromvich"ni mehmon qildi. O'yinda Jeyms Morrison hisobni ochgan bo'lsada, mezbonlarning ispaniyalik hujumchisi Alvaro Negredo penaltidan vaziyatni o'ngladi va yakuniy nuqtani qo'ydi - 1:1.

Bu mavsum Angliyada o'z maydonida hammadan ko'p ochko jamg'argan "Bernli" bu safar ham o'z ananasiga sodiq qoldi. SHon Daych shogirdlari amaldagi chempion "Lester"ni minimal hisobda taslim etishdi. Uchrashuvdagi yagona golni Sem Vouks kiritdi.

Quyi pog'onalardan borayotganlardan yana biri "Kristal Pelas" bu safar safarda "Bornmut"ni mag'lub etdi. Sem Ellardays qishki transfer oynasida ancha faol bo'ldi va bu o'z samarasini berdi desak ham bo'ladi. Skott Denn va Kristian Bentekelar tomonidan kiritilgan gollar jamoani 18-o'ringa olib chiqdi.

23-turning eng kutilmagan natijasi Londonda qayd etildi. CHempionlik uchun kurash olib borayotgan "Arsenal" o'z maydonida "Uotford"ga yutqazib qo'ydi. O'yinning boshlarida Yunus Qobul va Troy Dinilar tomonidan kiritilgan gollarga ikkinchi bo'lim boshida Aleks Ivobi bitta gol bilan javob berdi. Bu mag'lubiyat "to'pchilar"ni "shporlar"dan quyiga tushirib qo'ydi.

Turning markaziy o'yinida esa g'olib aniqlanmadi. "Enfild"da o'tgan uchrashuvda "CHelsi" himoyachisi David Luiz jarimadan to'p kiritib hisobni ochdi, 58 daqiqada esa Veynaldum muvozanatni tikladi. 77 daqiqada londonliklar to'purari Diego Kosta penaltidan unumli foydalana olmadi. Minole Kostaning zarbasini bartaraf etdi.

CHorshanba oqshomidagi o'yinlarni "Vest Xem" - "Manchester Siti" qarama-qarshiligi boshlab berdi. SHu kuni manchesterliklar safida birinchi bor asosiy tarkibda maydonga tushgan braziliyalik Gabriel Jezus o'z hisobiga bitta gol va golli pas yozdirib qo'ydi. Bu unga uchrashuvning eng yaxshi futbolchisi bo'lish uchun etarli bo'ldi. "Siti" mehmonda 4:0 hisobidagi g'alabani qo'lga kiritdi. "SHaharliklar"ning gollariga Jezusdan tashqari, De Bryuyne, Silva ham Yaya Turelar mualliflik qilishdi.

Yana bir kutilmagan natija "Old Trafford"da kuzatildi. "Manchester Yunayted" klubi autsayder "Xall Siti"ni enga olmadi. Bunga mehmonlar darvozaboni asosiy sababchi desak adolatli bo'ladi. Yakupovichning aqlbovar qilmas seyvlari shu kuni jamoasiga bir ochko taqdim etdi. "Qizil iblislar" esa yuqoridagilarga yaqinlashib olish imkoniyatini qo'ldan chiqarishdi.

Turni "Stok Siti" va "Everton" jamoalari o'rtasidagi uchrashuv yakunlab berdi. O'yinning ettinchi daqiqasidayoq Piter Krauch mezbonlarni hisobda oldinga olib chiqqan bo'lsa, 39 daqiqada Rayan SHoukross kutilmaganda o'z darvozasiga to'p kiritib yubordi. Uchrashuv 1:1 hisobida o'z yakuniga etdi.

APL. 23-tur

"Suonsi" - "Sautgampton" 2:1
"Sanderlend" - "Tottenxem" 0:0
"Midlsbro" - "Vest Bromvich" 1:1
"Bernli" - "Lester" 1:0
"Bornmut" - "Kristal Pelas" 0:2
"Arsenal" - "Uotford" 1:2
"Liverpul" - "CHelsi" 1:1
"Vest Xem" - "Manchester Siti" 0:4
"Manchester Yunayted" - "Xall Siti" 0:0
"Stok Siti" - "Everton" 1:1

"Eplmanager"da 22-turning eng ko'p ochko jamg'argan jamoasi:



Turning eng yaxshi futbolchilari: