Anvar Soliev: “Omadimiz chopmadi deyish bilan ish bitmaydi”

- O'yin haqida nima deyish mumkin? Jamoamiz oltita o'yindan iborat g'alabasiz seriyasiga barham berdi. Garchi bugungi uchrashuvda g'alabani qo'lga kiritgan bo'lsakda, natija bizni qoniqtirmadi. Yutuqsiz seriyani barham berganimiz xursand qilgan bo'lsada, muxlislarimiz qarshisida kerakli hisobni qayd etib keyingi bosqichga chiqish vazifasini uddalay olmadik. Buning uchun muxlislarimizdan uzr so'raymiz. Xato va kamchiliklardan tegishli xulosa chiqargan holda birinchi davraning qolgan uchta uchrashuviga munosib tarzda tayyorgarlik ko'rib, ijobiy natijalarni qo'lga kiritishga harakat qilamiz. O'rtada yuzaga keladigan kichik tanaffusda o'yinlarimizni tahlil qilib, birinchi davrani munosib tarzda yakunlash borasida bosh qotiramiz.

- Jamoani keyingi bosqichga chiqishi uchun nima etishmadi deb o'ylaysiz?
- Jamoamizni keyingi bosqichga chiqishiga gol etishmadi. Omadimiz chopmadi deyish bilan ish bitmaydi. Futbolchilarimizda gol urish uchun bir qator imkoniyatlar bo'lsada, bulardan foydalana olmadik. Azam Aliev, Oybek Qilichev va Dilshod Jabborovlarda yaxshigina vaziyatlar yuzaga kelgan bo'lsada maqsadga erisha olmadik. Hujumchilarimiz biroz oqsashmoqda. SHu sababli, vazifani bajara olmadik.

- Raqib o'yini haqida nima deya olasiz?
- “Neftchi” jamoasini himoyaga jiddiy tarzda etibor qaratib, qarshi hujumlardan samarali foydalanishga intilishlarini bilardik. SHundan kelib chiqqan holda bahsga hozirlik ko'rgandik. Ammo, yuqorida aytib o'tganimdek vaziyatlardan foydalana olmaslik bizga pand berdi. Bugun raqibga qaysidir manoda omad ham kulib boqdi deb o'ylayman. Farg'onaliklarga keyingi o'yinlarda omad tilayman.