Anvar Berdiev: "Agar futbolchi jamoaga emas, o'zi uchun o'ynasa, shaxsan menga kerak emas"

"Qiyin g'alabaga erishdik.  "Jayxun" menda ajoyib taassurot qoldirdi. Futbolchilar oxirigacha kurashishdi. O'zimizga kerakli bo'lgan natijaga erishdik. Yigitlarga borlarini berishgani uchun katta rahmat aytaman",- deydi Anvar Berdiev. 

- "Jayxun" ishtirok etadigan chempionatdan kelib chiqib bugun yirik hisobda taslim qilinishi kerakmidi? 

- Bunday fikr bo'lmadi. Kubok bahslarida har xil vaziyat bo'lishi mumkin. "Bunyodkor" bilan o'yindan keyin bu uchrashuvga astoydil tayyorlandik. 

- Abdug'ani Kamolov bugun kombinacion harakatlarda yaxshi o'yin ko'rsatdi... 

- Abdug'ani Kamolovni yaxshi bilaman. Jamoaga yordami tegadigan futbolchi. Orada malum vaqt o'yinini topa olmadi. Ko'rganingizdek yomon to'p tepmayapti. Uning uchun xursandman. 

- Birinchi o'zgarish haqida. Jasur Xolto'raev o'rniga Muhriddin Zoirov tushdi va gol ham urdi. Jasur Xolto'raev qo'l ham uzatmadi. Bunday holat "Aral" bilan o'yinda ham yuz bergan edi.. 

- Futbolchi maydonga chiqqanidan keyin murabbiy tomonidan berilgan ko'rsatmalarni bajarishi shart. Jasur Xolto'raev bugungi o'yinga kirishib keta olmadi. Futbolda o'zgartirib bo'lmaydigan futbolchi yo'q. Futbolchi jamoa uchun borini berib o'ynashi kerak. Agar futbolchi jamoaga emas, o'zi uchun o'ynasa, shaxsan menga kerak emas. Bu har bir futbolchiga tegishli. Keyingi safar yana shunday holat kuzatilsa, boshqa futbolchi almashtirilishi mumkin. Jamoa futbolchini boqyapti, maoshini, mukofot pullarini beryapti. Demak o'yinchi ham harakat qilishi kerak. 

- Futbolchiga qandaydir cheklovlar qilinadimi?

- Birinchisida Jasur Xolto'raev xatosini tan olib, kechirim so'ragandi. Bir marta kechirish mumkin, ikkinchisida o'rniga futbolchi qidirish kerak. 

- SHerali Jo'raev bilan xayrlashish yosh bilan bog'liqmi yoki qandaydir jazo turi qo'llanilganmi? 

- Buni oldingi matbuot anjumanida aytdim. SHerali Jo'raevga omad tilayman. Boshqa jamoaga borib qo'shilsa foydasi tegadi.Negadir u mavsum boshida jarohat olib o'ynab keta olmadi. U bilan do'stona xayrlashdik.