Andrey Miklyaev: "OCHLda "Paxtakor"ga qarshi o'ynasak xursand bo'laman"

"Ertaga juda ham muhim o'yin bo'ladi. Bu o'yinda guruhdan chiqish taqdiri hal bo'ladi. Jamoadagi barcha futbolchilar o'yinga tayyor holatda ertangi bahsga tayyorgarlik ko'rishmoqda. Guruh bosqichidagi mag'lubiyatsiz seriyamizni davom ettirib keyingi bosqichga chiqishga urinamiz", - deydi Andrey Miklyaev.

"Jamoamiz o'yinda to'liq tayyor. "Al Nasr" bizga o'xshab to'p bilan muomala qilishni yaxshi ko'rar ekan. SHu bois ertaga chiroyli va tomoshabop o'yin bo'lsa kerak", - deydi Islom To'xtaxo'jaev. 

- "Bunyodkor" o'z stadionida OCHLda umuman gol ura olmadi. Balki buni "Lokomotiv" boshlab berar?

- Umid qilamanki biz ertaga gol uramiz. Bu stadion biz uchun omadli hisoblanadi. O'tgan yil shu erda O'zbekiston Superkubogini qo'lga kiritgandik.

- O'yindan oldin sizni nima tashvishlantirmoqda?

- Markaziy himoya. Nemanya Yanichich oxirgacha tuzalmadi. Balki ertaga uni maydonda ko'rarmiz. Hozircha bu borada yakuniy qarorga kelmadik.

- "Lokomotiv" ushbu mavsumda umuman mag'lubiyatga uchramadi. Bunda nima rol o'ynadi deb o'ylaysiz?

Islom To'xtaxo'jaev: - Biz qishki yig'inlar chog'ida ham o'rtoqlik uchrashuvlarda yutqazmadik. Jamoa azolari bir oiladek bo'lib ketdi. Ahillik tufayli shunday natijalarni qo'lga kiritayapmiz.

- Ertangi o'yindan oldin durang natija qayd etiladi desa siz xursand bo'lasizmi?

- Qanday durangligiga bog'liq. Agar biz yaxshi o'ynab durangga erishsak va guruhdan chiqsak albatta xursand bo'laman. Lekin OCHLda syurprizlar juda ko'p bo'layapti, safarda yutib o'z uyida yutqazib qo'ygan klublarni ham ko'rdik.

- "Al Ittihod" va "Sepaxon" o'rtasidagi o'yindan nima kutayapsiz?

- O'yin bir vaqtda boshlangani juda yaxshi. Men "Sepaxon"ning raqibga munosib qarshilik ko'rsatishini va o'z nomini saqlab qolish uchun o'ynashini kutayapman. 

- "Paxtakor" va "Lokomotiv" guruhdan chiqsa bir biriga to'qnash kelib qolishi mumkin. Buni kutganmidingiz?

- SHaxsan men "Paxtakor"ga ham o'z jamoamga ham omad tilayman. Bu futbol. 1/8 finalda to'qnash kelsak O'zbekistonning bitta klubi chorak finalda bo'lishi aniq bo'ladi. Bundan albatta xursand bo'lardim. Bu o'zbek futboli uchun ham katta yutuq bo'lardi.

Narzulla Saydullaev