Andrey Miklyaev: "Mavsumni yuqori o'rinlarda yakunlashga harakat qilamiz"

"Birinchi galda "Sug'diyona"ni g'alaba bilan tabriklayman. Bugun kurashlarga boy o'yin bo'ldi. Lekin, ochko olishni uddasidan chiqa olmadik. Bugun bizning kunimiz bo'lmadi. Albatta, alamli mag'lubiyatga uchradik. Birinchi bo'limning o'zida darvozamizdan ikkita to'p olib chiqdik. Birinchi bo'lib burchak zarbasidan, so'ng yana bir standart vaziyatdan. Safardagi 0:2 hisobida yutqaza turib undan chiqib ketish og'ir. Etibor bergan bo'lsangiz, ikkinchi bo'limda o'yinni o'z tomonimizga og'dirishga harakat qildik. Vaziyatlar yaratdik.Oradagi farqni qisqartirishga erishdik. Yutib ketishimiz ham mumkin edi. Yigitlarda g'alabada uchun xohish kuchli edi. Faqat vaziyatlardan foydalana olmadik. Futbolda bunday holatlar bo'lib turadi",- deydi Miklyaev.

- "Lokomotiv" birinchi bo'limda 0:2 hisobida mag'lubiyatga uchrayotganiga qaramasdan ikkinchi bo'limda juda yaxshi o'ynadi. Jamoa birinchi bo'limda shu o'yinni ko'rsatganida natija boshqacha bo'lishi mumkin edi...

- Mumkin edi. Futbol shunaqa o'yin, unda gollar turlicha bo'ladi. Birinchi gol mantiqqa to'g'ri kelmasdi. Burchak zarbasi amalga oshirildi, jarima maydonchasi ichida bir nechta futbolchi bor edi. Darvozabon esa vaziyatni kuzata olmadi. Jarima zarbasi ham mukammal tarzda ijro etildi. "Sug'diyona" 2:0dan keyin himoyaga etibor qaratdi va qarshi hujumlardan foydalanishga harakat qildi. Bunday pallada himoyani yorib o'tish qiyin kechadi. Harakat qildik, yaxshi vaziyatlar bo'ldi. Raqib darvozaboni bugun juda yaxshi o'ynaganini aytib o'tish joiz. Bir qancha vaziyatlarda jamoasini muqarrar gollardan qutqardi. 

- Jamoaning turnir jadvalida egallab turgan hozirgi o'rnini omadsizlikka qiyoslasa bo'ladimi?

- Ayni paytda jamoa qaytadan qurilmoqda va tiklanmoqda. Jamoamizda yosh futbolchilar ko'p. Aksariyat futbolchilar klubni tark etishdi. Etiborimizni yoshlarga qaratyapmiz. Buning uchun bizga vaqt kerak. 

- "Lokomotiv" ikkinchi davrani yomon boshlamadi. Jamoani mavsum yakunida qaysi o'rinda ko'rishimiz mumkin?

- Har bir o'yinda maydonga g'alaba uchun chiqamiz. Maqsadimiz turnir jadvalida tepaga ko'tarilish. Mavsumni yuqori o'rinlarda yakunlashga harakat qilamiz.